मध्य प्रदेशात भाजप ४० पेक्षा अधिक विद्यमान आमदारांना तिकीट नाकारणार?

नवी दिल्ली : पुढील महिन्यात राजस्थान, मध्य प्रदेश आणि तेलंगणामध्ये होऊ घातलेल्या राज्य विधानसभा निवडणुकांसंदर्भात भाजपाच्या केंद्रीय निवडणूक समितीची आज दिल्लीत महत्वाची बैठक पार पडली आहे. दरम्यान, या बैठकीला पंतप्रधान नरेंद्र मोदी आणि पक्षाध्यक्ष अमित शाह यांच्यासह भाजपचे अनेक वरिष्ठ नेते सुद्धा उपस्थित होते.

दरम्यान बैठकीअंती आणि राज्यातील संपूर्ण स्थितीचा आढावा घेऊन भारतीय जनता पार्टी आज अधिकृतपणे छत्तीसगड, मध्य प्रदेश आणि तेलंगणातल्या विधानसभा निवडणुकीसाठीच्या उमेदवारांच्या नावांची घोषणा करणार असल्याचे वृत्त आहे. या बैठकीत मध्य प्रदेशचे मुख्यमंत्री शिवराज सिंह चौहान यांच्या मंत्रिमंडळातील अनेक मंत्री आणि आमदारांच्या खराब कामगिरीसंदर्भात सुद्धा सविस्तर चर्चा झाली आहे. हाती आलेल्या वृत्तानुसार, मध्य प्रदेशातील ४० पेक्षा अधिक विद्यमान विधानसभा आमदारांना घरी बसवलं जाणार आहे असं समजतं.

विशेष म्हणजे त्यात मध्य प्रदेश भाजपच्या काही मंत्र्यांचा सुद्धा समावेश आहे. तसेच भारतीय जनता पक्षाचे जवळपास अर्ध्या डझनांहून अधिक खासदारांना या विधानसभा निवडणुकीत उतरवण्याची वेळ मध्य प्रदेश भाजपवर आली आहे. राजस्थानच्या मुख्यमंत्री वसुंधरा राजें यांनी सुद्धा तब्बल ८० उमेदवारांची यादी केंद्रीय नेतृत्वाला सोपवली आहे.