महागाईत भाजप-शिवसेना सरकारची भेट, मुंबईत घर खरेदी अजून महागणार

मुंबई : मुंबईकरांना घर खरेदी करणे अजून आवाक्याबाहेर जाणार आहे. कारण भाजप-शिवसेना युती सरकारने स्टॅम्प डय़ुटीत १ टक्का वाढ केली असून तसे विधेयक विधानसभेत काल अधिकृतपणे मंजूर केले आहे. दरम्यान, अधिवेशनात मुंबई महानगरपालिका अधिनियम सुधारणा विधेयक सुद्धा कोणतीही चर्चा न करता गोंधळातच मंजूर झाले असे वृत्त आहे.

दरम्यान, या विधेयकामुळे स्टॅम्प डय़ुटीत १ टक्का एवढी वाढ होणार आहे. शहरातील मेट्रो, मोनो, जलद बस सेवांच्या विकासासाठी ही अतिरिक्त स्टॅम्प डय़ुटी आकारली जाणार आहे असे म्हटले आहे. त्यामुळे एकूण मालमत्तेवरील स्टॅम्प डय़ुटी आता ६ टक्क्यांवरून ७ टक्के झाली आहे आहे. त्यामुळे प्रॉपर्टीच्या विक्री, दान तसेच तारण ठेवण्यासाठी देण्यात येणा-या स्टॅम्प डय़ुटीत वाढ होणार आहे. या निर्णयामुळे मुंबईकरांचा घर खरेदी करताना खर्च वाढणार आणि घर खरेदीची स्वप्नं अजून महाग होणार आहेत.

ग्राहकाला कोणत्याही इमारतीतील खरेदी-विक्री, भाडेतत्त्वावरील करार, बक्षीस पात्र करारनामा असो वा तारण ठेवलेली कागदपत्रे, या सर्वांसाठी स्टॅम्प डय़ुटी अनिवार्य असते. त्यामुळे एकूण स्टॅम्प डय़ुटी आता ७ टक्के आकारली जाणार आहे. दरम्यान, या निर्णयाचा अजून एक नकारात्मक परिणाम बांधकाम क्षेत्रावर होणार आहे.