EPF Money | तुमचा ईपीएफ'मधील अधिक पैसा शेअर बाजारात गुंतवला जाणार, नेमका काय परिणाम होणार जाणून घ्या

EPF Money | कर्मचारी भविष्य निर्वाह निधी संघटना (ईपीएफओ) आता शेअर बाजारात मोठी पैज लावण्याच्या तयारीत आहे. शेअर्समध्ये गुंतवलेले पैसे वाढवण्याचा ईपीएफओचा मानस आहे. सध्या ‘ईपीएफओ’ची इक्विटी बाजारातील गुंतवणुकीची मर्यादा १५ टक्के आहे. ती २० टक्क्यांपर्यंत वाढवता येऊ शकते. ‘ईपीएफओ’च्या केंद्रीय विश्वस्त मंडळाकडून (सीबीटी) २९ आणि ३० जून रोजी होणाऱ्या बैठकीत इक्विटीतील हिस्सा वाढवण्याचा प्रस्ताव येण्याची शक्यता असून, या बैठकीत त्याला मंजुरीही मिळू शकते, असे अधिकृत सूत्रांनी सांगितले.

शेअर्समधील गुंतवणुकीची मर्यादा वाढवण्याच्या प्रस्ताव :
एनडीटीव्हीने पीटीआयच्या हवाल्याने म्हटले आहे की, शेअर्समधील गुंतवणुकीची मर्यादा वाढवण्याच्या प्रस्तावाला ईपीएफओची सल्लागार संस्था आणि वित्त लेखापरीक्षण आणि गुंतवणूक समितीने (एफएआयसी) यापूर्वीच मान्यता दिली आहे. आता फईकच्या शिफारशी केंद्रीय विश्वस्त मंडळाच्या बैठकीत ठेवण्यात येणार आहेत. ईपीएफओचे सध्या सुमारे ५ कोटी ग्राहक आहेत. सध्या ईपीएफओ काही एक्सचेंज ट्रेडेड फंडांमध्ये (ईटीएफ) सुमारे 1,800-2,000 कोटी रुपयांची गुंतवणूक करते.

एफएआयसी’ने शेअरमध्ये वाढ करण्याची शिफारस केली आहे :
सोमवारी लोकसभेत लेखी उत्तर देताना कामगार व रोजगार राज्यमंत्री रामेश्वर तेली म्हणाले की, केंद्रीय विश्वस्त मंडळ (सीबीटी) उपसमिती वित्त लेखापरीक्षण व गुंतवणूक समितीने (एफएआयसी) गुंतवणूक श्रेणी चारमधील इक्विटी गुंतवणूक ५-१५ टक्क्यांवरून ५-२० टक्क्यांपर्यंत वाढविण्याचा प्रस्ताव दिला आहे. ईपीएफओने ऑगस्ट २०२१ पासून एक्सचेंज ट्रेडेड फंडांमध्ये गुंतवणूक करण्यास सुरुवात केली होती आणि ईटीएफमध्ये आपल्या एकूण गुंतवणूकयोग्य निधीपैकी केवळ ५ टक्के गुंतवणूक केली होती. त्याचबरोबर चालू आर्थिक वर्षात ईपीएफओची ईटीएफमधील गुंतवणूक 15 टक्क्यांपर्यंत वाढली आहे.

कमी व्याजदराने ईपीएफ सदस्यांमध्ये नाराजी :
ईपीएफवर सध्याचा ८.१ टक्के व्याजदर हा १९७७-७८ नंतरचा सर्वात कमी व्याजदर आहे. सध्या ईपीएफओ 4 दशकातील सर्वात कमी व्याज देत आहे. आर्थिक वर्ष 2021-22 साठी 8.1 टक्के व्याजदराला मंजुरी देण्यात आली. ईपीएफओला शेअर्समध्ये गुंतवणूक करून डेट सिक्युरिटीजमधून मिळणाऱ्या कमी रिटर्नची भरपाई करायची आहे.

म्युच्युअल फंड व्यवस्थापकांचीही भेट घेतली :
मणिकंट्रोलच्या रिपोर्टनुसार, ईपीएफओला दररोज सुमारे 600 कोटी रुपये मिळतात. यातील २०० कोटी रुपये दावे निकाली काढण्यासाठी खर्च केले जातात. इक्विटी योजनांमध्ये गुंतवणूक करण्याच्या शक्यतांचे मूल्यांकन करण्यासाठी ईपीएफओच्या अधिकाऱ्यांनी यापूर्वी म्युच्युअल फंड व्यवस्थापकांचीही भेट घेतली होती.

नुकसान झाल्यास फटका ईपीएफ सदस्यांना :
शेअर बाजारातील कोणतीही गुंतवणूक ही जोखमींवर आधारित असते. परिणामी भविष्यात कोणत्याही नुकसानास ईपीएफ सदस्यांना त्याचा थेट फटका बसेल. तर दुसरीकडे याबाबत ईपीएफओ आपल्या सदस्यांकडून एखादं डिस्क्लेमर सुद्धा लिहून घेऊ शकतो अशी शक्यता वर्तविण्यात येतं आहे. तसेच नफा झाल्यास तो ईपीएफ सदस्यांसोबत सरकार शेअर करेल का याची देखील कोणतीही हमी मिळणार का याची देखील शक्यता कमीच असल्याचं तज्ज्ञ सांगतात.

महत्वाचं : तुम्हाला हा लेख/बातमी आवडली असेल तर नक्की शेअर करा आणि महाराष्ट्रनामाला फॉलो करा. तसेच शेअर बाजारातील गुंतवणुकीसंदर्भात तज्ज्ञांनी दिलेल्या सल्ल्याशी आमचा काहीही संबंध नाही. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. शेअर खरेदी/विक्री हा बाजार तज्ज्ञांचा सल्ला आहे. म्युच्युअल फंड आणि शेअर बाजारातील गुंतवणूक ही जोखमींवर आधारित असते. त्यामुळे कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.

News Title: EPF Money EPFO likely to enhance investment ratio limit in equities up to 20 percent check details 19 July 2022.