यांचं सगळंच अवघड झालं राव! अशोक चव्हाणही राजीनाम्याच्या तयारीत?

मुंबई : लोकसभा निवडणुकीसाठी उमेदवारी देण्यावरून काँग्रेसमधील अंतर्गत वाद चव्हाट्यावर आला आहे. खुद्द काँग्रेसनेतेअशोक चव्हाण यांनीच आपण प्रदेशाअध्यक्ष पदाचा राजीनामा देण्याच्या तयारीत असल्याचे कार्यकर्त्याशी बोलताना म्हटले. या संदर्भातील एक ऑडियो क्लीप सध्या व्हायरल झाली असून त्यात ते राजीनामा देण्याच्या तयारीत सांगत आहेत.

चंद्रपूरमध्ये शिवसेनेचे आमदार बाळू धानोरकर यांना काँग्रेसकडून उमेदवारी देण्यासाठी अशोक चव्हाण इच्छूक होते. मात्र काँग्रेसकडून विनायक बांगड यांना उमेदवारी देण्यात आली आहे. वास्तविक पाहता चव्हाण यांच्या सांगण्यावरूनच आमदार धानोरकर यांनी आमदारकीचा राजीनामा देत शिवसेनेला जय महाराष्ट्र केले होते.

मात्र त्यांनाच मी लोकसभेची उमेदवारी देऊ शकलो नाही. माझे कुणीच ऐकत नाही. त्यामुळे मलाच प्रदेशाध्यक्षपदाचा राजीनामा द्यावासा वाटतो, अशी भावना चव्हाण यांनी क्लिपमध्ये व्यक्ती केली आहे. या क्लिपमुळे काँग्रेसमधील अंतर्गत कलह आता समोर आले आहे. हे कलह ऐन निवडणुकीच्या तोंडावर काँग्रेससाठी अडचणीचे ठरण्याची शक्यता आहे.