तब्बल सहा तासांच्या खोळंब्यानंतर एअर इंडियाचा सर्व्हर सुरु

नवी दिल्ली : एअर इंडियाचे तांत्रिक बाबी सांभाळणारे ‘सिता सर्व्हर’ डाऊन झाल्याने देशभरातील विमानसेवा विस्कळीत झाली होती. तब्बल सहा तासांच्या खोळंब्यानंतर एअर इंडियाचा सर्व्हर सुरु झाला आहे. त्यामुळे विमानतळांवर अडकून राहिलेल्या प्रवाशांनी अखेर निश्वास सोडला आहे.

‘सिता सर्व्हर’ डाऊन झाल्याने देशभरातील एअर इंडियाची विमान उड्डाणं थांबली होती. पहाटे ३.३० वाजल्यापासून एकाही विमानाचे उड्डाण झाले नसल्याने प्रवाशांची मोठी गैरसोय झाली होती. चेक इनसह इतर प्रक्रियाही पूर्ण होण्यात अडचण येत असल्याने भारतासह परदेशातील एअर इंडियाच्या प्रवाशांना अडचणीला सामोरे जावे लागत होते. अखेर ‘सिता सर्व्हर’मधील बिघाड दुरुस्त केल्यानंतर सकाळी ९:४५ च्या सुमारास एअर इंडियाची विमानसेवा सुरु झाली आहे.