२८ जुलै; आज जागतिक हेपॅटायटिस दिन: जाणून घ्या अधिक माहिती

मुंबई : संपूर्ण जगाला धोकादायक असलेल्या हेपॅटायटिस या आजाराबद्दल सर्वसामान्यांमध्ये फार कमी माहिती असते. २८ जुलै हा दिवस जागतिक हेपॅटायटिस दिवस म्हणून साजरा केला जातो. हेपॅटायटिस (यकृतदाह) हा आजार विशिष्ठ प्रकारच्या विषाणूंमुळे होतो. या विषाणूंचे ए, बी, सी, डी, आणि ई अशा पाच प्रकारात वर्गीकरण केले जाते. ए आणि ई या दोन विषाणूंमुळे होणार यकृतदाह प्रामुख्याने दूषित पाणी व अन्न यामुळे होतो.

त्यामुळे आपल्या दैनंदिन जीवनात आपण आपल्या आरोग्याच्या दृष्टीने स्वच्छता राखणे गरजेचे आहे. हेपॅटायटिस बी व सी या आजाराचे विषाणू प्रामुख्याने दूषित रक्त, शस्त्रक्रिया, गोंदवून घेणे यामुळे पसरतात. भारतात हेपॅटायटिस बी मुले पाच ते सात कोटी लोक आणि हेपॅटायटिस सी मुले अडीच ते तीन कोटी लोक बाधित आहेत. या रोगाबद्दल माहिती नसल्याने व वेळीच निदान न झाल्याने अनेक लोक यामुळे मृत्युमुखी पडतात. हेपॅटायटिस सीच्या विरुद्ध प्रतिबंधक लस उपलब्ध नाही. परंतु या आजारावर साधारण तीन महिने न चुकता उपचार करून या आजारावर मात करता येऊ शकतो.

जागतिक आरोग्य संघटना आणि केंद्रसरकार यांनी पुढाकार घेतल्यामुळे हेपॅटायटिसचे संपूर्ण निर्मूलन या मोहिमेकरिता मंजुरी दिली आहे. सन २०३० पर्यंत भारत या रोगापासून मुक्त व्हावा असा सामान्य हेतू या मोहिमेचा असून या बाबतीत अधिक काम सध्या या मोहिमेकडून करण्यात येत आहे. यावर कमी किमतीत लसीकरण उपलब्ध करून देणे व या आजाराबद्दल जनजागृती करणे हे या मोहिमेचे मुख्य उद्धिष्ट आहे. त्यामूळे सध्याच्या या धकाधकीच्या आयुष्यात आपण आपल्या आऱोग्याकडेही लक्ष देणे तितकेच गरजेचे आहे. साधारण सहा महिन्यातून एकदा तरी पूर्ण शरीर तपासणी करणे गरजेचे आहे. जेणे करून आवश्यक असे उपचार आपल्या शरीराला मिळाल्यास शरीर कुठल्याही प्रकारच्या आजाराला बळी पडणार नाही. व आपल्याला निरोगी आयुष्य जगता येईल.