रविकांत तुपकर यांची घरवापसी; पुन्हा येणार स्वाभिमान पक्षात

पुणे: काही दिवसांपूर्वीच स्वाभिमानी शेतकरी संघटनेची साथ सोडलेले राजू शेट्टी यांचे खंदे समर्थक रविकांत तुपकर पुन्हा घरवापसी करणार आहेत. आज, सायंकाळी ते स्वाभिमान पक्षात पुन्हा प्रवेश करणार आहेत. काही दिवसांपूर्वी तुपकर यांनी स्वाभिमानीला सोडचिठ्ठी देऊन सदाभाऊ खोत यांच्या रयत क्रांतीमध्ये प्रवेश केला होता. मात्र काही दिवसांमध्येच ते पुन्हा आपल्या मुळ घरी परतणार असल्याने राजू शेट्टींना दिलासा मिळाला आहे.

तुपकर हे स्वाभिमानीचे प्रदेशाध्यक्ष होते. राजू शेट्टी यांच्या उपस्थितीत ते पुन्हा स्वाभिमानीत प्रवेश करतील, अशी माहितीही समोर येत आहे. अंतर्गत राजकारणामुळे तुपकर यांनी राजू शेट्टींची साथ सोडली होती. विधानसभा निवडणुकीच्या तोंडावर स्वाभिमानी शेतकरी संघटनेला मोठा धक्का बसला होता. २६ सप्टेबरला स्वाभिमानीचे प्रदेशाध्यक्ष रविकांत तुपकर यांनी आपल्या पदाचा राजीनामा दिला होता. रविकांत तुपकर हे पक्षाचे अध्यक्ष आणि माजी खासदार राजू शेट्टी यांचे खंदे समर्थक मानले जात होते.

तत्पूर्वी रवीकांत तुपकर यांनी आपल्या प्रदेशाध्यक्षपदाचा तसेच सदस्यत्वाचा राजीनामा राजू शेट्टी यांना पाठवला होता. ‘मी गेल्या अनेक वर्षांपासून स्वाभिमानी शेतकरी संघटनेचा एक सक्रीय कार्यकर्ता म्हणून कार्यरत होतो. माझ्याकडे प्रदेशाध्यक्षपदाची जबाबदारी होती. पण आज प्रदेशाध्यक्षपदाचा आणि सदस्यत्वाचा राजीनामा देत आहे, तो मंजूर करावा’ असे म्हटले होते. त्यानंतर त्यांनी सदाभाऊ खोत यांच्या रयत क्रांतीमध्ये प्रवेश केला होता.