जित्याची खोड मेल्याशिवाय जात नाही; अजित पवारांचा चंद्रकांत पाटलांना टोला

पुणे: राज्यात सत्तेत असलेल्या महाविकासआघाडी सरकारच्या राज्यमंत्रिमंडळाचा विस्तार सोमवार ३० डिसेंबर रोजी होणार असल्याचे निश्चित समजले जात आहे. या पार्श्वभूमीवर बोलताना भारतीय जनता पक्षाचे प्रदेशाध्यक्ष आमदार चंद्रकांत पाटील यांनी शिवसेनेनं राष्ट्रवादी काँग्रेसला गृहमंत्रिपद देऊ नये असा सल्ला मुख्यमंत्री उद्धव ठाकरे यांना दिला आहे. एनसीपीला गृहमंत्रिपद दिल्यास मातोश्रीवरही कॅमेरे लागतील, असंही पाटील म्हणाले होते. त्यांच्या या वक्तव्याला एनसीपीचे नेते आणि माजी उपमुख्यमंत्री अजित पवार यांनी पुण्यात प्रसार माध्यामांशी बोलताना उत्तर दिले आहे.

चंद्रकांत पाटील यांनी काय बोलावं हा त्यांचा अधिकार आहे, मुळात त्यांच्या मनात एवढ्या वेदना होत आहेत की, त्यांचा २५ वर्षांपासूनचा मित्र पक्ष शिवसेना त्यांच्यापासून बाजूला गेल्यामुळे त्यांच्या आमदारांची संख्या १०५ असुनही त्यांना सरकार बनवत आलं नाही. हे दुःख त्यांच्या मनात खूप वेदना देऊन जात आहे. म्हणून सातत्याने अशाप्रकारची वक्तव्यं त्यांच्याकडून केली जात आहेत, असं अजित पवार यांनी म्हटलं आहे.

हातची सत्ता गेल्यामुळे चंद्रकांत पाटील त्यांचे दु:ख मी समजू शकतो. जित्याची खोड मेल्याशिवाय जात नाही. कावळ्यांच्या शापाने गाया मरत नाही, असा शब्दांत अजित पवार यांनी चंद्रकांत पाटील खोचक टीका केली. विजयसिंह मोहितेंवर बोलण्यास मात्र अजित यांनी नकार दिला.

कर्जमाफीचा श्रेय घेण्याचा कोणताही वाद महाविकास आघाडीत नाही. जिल्हा परिषदेच्या निवडणुकांवरही त्यांनी भाष्य केले. याबाबत मुंबईत बोलणे झाले असून तीनही पक्षांच्या प्रमुखांनी निर्णय घेतला असल्याचे सांगितले. या निवडणुकांमध्ये महाविकास आघाडीच्या विचारांच्या स्थानिक पक्षप्रमुखांकडून एकत्र बसून निर्णय घेण्यात येणार असून तिथे एकमत नाही झालं तर वरिष्ठ पातळीवर निर्णय घेण्यात येईल असेही त्यांनी म्हटले.

Web Title:  Former Deputy Minister and NCP Leader Ajit Pawar slams BJP State President Chandrakant Patil over Home Ministry Statement.