गॅसच्या किंमत १५०'ने वाढल्याने आंदोलन करणाऱ्या भाजपच्या सदस्यांशी मी सहमत: राहुल गांधी

नवी दिल्ली: गेल्या काही दिवसांपासून गॅसच्या किमतीत सतत वाढ होत आहे. त्यामुळं येत्या काही दिवसांत सर्वसामन्यांचे जेवण महागणार आहे. त्यामुळं आता सर्वसामन्यांना जास्त पैसे खर्च करावे लागतील. विना अनुदानित गॅस सिलिंडरच्या किमतीत विक्रमी वाढ झाली आहे. दरवाढ किंवा घट ही महिन्याच्या १ तारखेलाच होत असते. मात्र, अचानक दरवाढ केल्याने ग्राहकांना आर्थिक फटका बसण्याची शक्यता आहे. मंगळवारपर्यंत सिलेंडरचा दर ७२१.५० रुपये इतका होता. मात्र, तो आता वाढून ८६६.५० रुपये झाला आहे. पुण्यात काल ७०४ तर आज तब्बल ८४९ रुपये असा सिलेंडरचा दर आहे.

दर महिना सबसिडी आणि बदलत जाणाऱ्या बाजार भावानुसार गॅसच्या किंमतीत बदल होत असतो. याआधी १ जानेवारी २०२० रोजी गॅस सिलिंडरच्या किंमती वाढल्या होत्या. मात्र फेब्रुवारी महिन्याच्या सुरुवातीला या दरामध्ये कोणताही बदल झालेला नव्हता. सरकार दरवर्षी १२ सिलिंडरवर अनुदान देते. बजेटच्या आधी कमर्शिअल गॅस सिलिंडरमध्ये २२४.९८ रुपयांची वाढ झाली असून, व्यापाऱ्यांना आता व्यावसायिक सिलिंडर्ससाठी १५५०.०२ रुपये मोजावे लागत आहेत.

घरगुती गॅसच्या किंमती वाढल्यानंतर काँग्रेसचे माजी अध्यक्ष राहुल गांधी यांनी सत्ताधारी भाजपवर निशाणा साधलाय. राहुल गांधी यांनी भाजप नेत्या स्मृती इराणी यांचा एक जुना फोटो सोशल मीडियावर शेअर करत भाजपला टोला हाणलाय. या फोटोमध्ये स्मृती इराणी गॅस सिलिंडर घेऊन रस्त्यावर आंदोलन करताना दिसत आहेत. ‘एलपीजी सिलिंडरच्या किंमती १५० रुपयांनी वाढल्याचा विरोध करणाऱ्या या भाजपच्या सदस्यांशी मी सहमत आहे’ असं म्हणत राहुल गांधी यांनी भाजपला टोला हाणलाय.

I agree with these members of the BJP as they protest the astronomical 150 Rs price hike in LPG cylinders. #RollBackHike pic.twitter.com/YiwpjPdTNX

— Rahul Gandhi (@RahulGandhi) February 13, 2020

राहुल गांधी यांनी सोशल मीडियावर शेअर केलेला स्मृती इराणी यांचा हा फोटो १ जुलै २०१० रोजीचा आहे. त्यावेळी स्मृती इराणी या भाजपच्या महिला मोर्चाच्या अध्यक्ष होत्या. पश्चिम बंगालचे भाजप अध्यक्ष राहुल सिन्हा यांच्यासोबत त्यांनी कोलकातामध्ये आंदोलन केलं होतं.

Web Title: LPG price hike Congress MP Rahul Gandhi hit out BJP with Union Minister Smriti Irani photo.