संभाजीनगर महापालिका निवडणुकीच्या पार्श्वभूमीवर राज ठाकरेंचं कार्यकर्त्यांना मार्गदर्शन

औरंगाबाद : आपल्याच पक्षात काही लोक गद्दार आहेत. मीडियामध्ये चुकीच्या बातम्या देतात. या गद्दारांची नावं मला कळली असून त्यांची मी पक्षातून हकालपट्टी करणार असल्याचं मनसे अध्यक्ष राज ठाकरे म्हणाले आहे. सध्या राज ठाकरे आणि मनसे पक्षाच्या उभारणीसाठी मैदानात उतरले आहेत. औरंगाबादच्या दौऱ्यावेळी राज ठाकरे कार्यकर्त्यांशी बोलत होते.

राज ठाकरे म्हणाले की, मनसे पक्षाबाबत काही पदाधिकारी जाणीवपूर्वक खोट्या बातम्या पसरवत आहे. तसेच अशा पदाधिकारांची नावं देखील माझ्याकडे आली असून अशा गद्दारांबाबत दोन दिवसात निर्णय घेणार असल्याचा इशारा देखील राज ठाकरेंनी दिला आहे.

‘मी पक्षाच्या बैठकीसाठी आलो आहे. कार्यकर्त्यांसोबत संवाद साधला. आपल्याला जोरात काम करायचं आहे. पण काही लोक चुकीच्या बातम्या देतात. आपलेच कार्यकर्ते गद्दार आहेत. त्यांची नावं मला समजली असून मी त्यांना पक्षातून हद्दपार करणार’ असल्याचं राज ठाकरे म्हणाले. ‘गद्दारपणा करणाऱ्यांना पक्षात जागा नाही त्यांची हकालपट्टी मी करणार आहे. 2 दिवसात त्यांना पक्षातून हकालणार आहे’ अशा थेट इशारा राज ठाकरे यांनी दिला आहे. दरम्यान, मनसे अध्यक्षांनी कार्यकर्त्यांना देखील मार्गदर्शन केलं आहे आणि संभाजीनगर महानगरपालिका निवडणूक संपूर्ण ताकदीने लढविण्याचा निश्चय केल्याचं संवादात दिसलं.

आज सन्मा. राजसाहेबांनी संभाजीनगर येथील महाराष्ट्र सैनिकांना येणाऱ्या निवडणुकीच्या पार्श्वभूमीवर मार्गदर्शन केलं. त्या मेळाव्याची क्षणचित्रं…#राजठाकरे_महाराष्ट्रदौरा pic.twitter.com/9b3cWwWBRX

— MNS Adhikrut (@mnsadhikrut) February 15, 2020

दरम्यान, काल राज ठाकरे औरंगाबाद दौरा अर्धवट सोडणार असल्याच्या बातम्या माध्यमांमध्ये आल्या होत्या. यानंतर जेष्ठ नेते बाळा नांदगावकर याना स्पष्टीकरण द्यावे लागले होते. काही माध्यमांनी चुकीच्या आणि अपूर्ण माहितीच्या आधारे चुकीच्या बातम्या दिल्या आहे. राज ठाकरेंच्या सोबत पदाधिकारी आणि कार्यकर्त्यांच्या बैठकी नियोजित होत्या त्या झालेल्या आहेत. असा खुलासा मनसे नेते बाळा नांदगावकर यांनी फेसबुक वर व्हीडीओद्वारे केला आहे.

Web Title: MNS Chief Raj Thackeray guidance to party workers over Sambhajinagar Municipal Corporation Election.