गुदगुल्या केल्या म्हणून मी त्या अभिनेत्याच्या थोबाडीत मारली : राधिका

मुंबई : एका तामिळ अभिनेत्याने शूटिंग दरम्यान माझ्या पायाला गुदगुल्या करायला सुरुवात केल्याने मी त्याच्या थोबाडीत लगावली होती अशी एका प्रसंगाची आठवण प्रसिद्ध बॉलीवूड अभिनेत्री राधिका आपटे हिने एका कार्यक्रमात बोलून दाखवली.

नेहा धुपियाच्या ‘बीबीएफ्ज विद वोग’ या चॅट शो दरम्यान तिने त्या प्रसंगाचा उल्लेख केला. कार्यक्रमातील चर्चेदरम्यान तिने तामिळ सिनेमाच्या शूटिंग दरम्यान घडलेल्या एका वाईट अनुभवाची आठवण शेअर केली.

तामिळ सिनेमाच्या शूटिंग दरम्यान त्या सेटवर माझा पहिलाच दिवस होता. त्या शूटिंग दरम्यानच एका तामिळ अभिनेत्याने माझ्या पायाला गुदगुल्या करण्यास सुरुवात केली आणि मी अभिनेत्याला त्यापूर्वी कधीच भेटली नव्हते. पण तरीही एका अनोळखी व्यक्तीबरोबर एखादी व्यक्ती असं कस करू शकते हे बघूनच मला धक्का बसला. मला शेवटी सहन न झाल्याने मी तामिळ अभिनेत्याच्या थोबाडीत मारली असं राधिकाने शो मधील चर्चेदरम्यान सांगितलं.

राधिका आपटे सोशल मीडियावर एक प्रसिद्ध अभिनेत्री म्हणून सर्वांना ज्ञात आहे. सोशल मीडियावर तिने एकदा तिचा समुद्रकिनाऱ्यावरील बिकनी घालून शूट केलेला फोटो अपलोड केल्याने तिला ट्रोल केलं होतं. त्यावर तिने ट्रोल करणाऱ्यांना बीचवर बिकनी नाही तर साडी नेसणार का असं थेट उत्तर दिलं होतं. राधिका आपटे तिच्या ह्या रोखठोक स्वभावासाठी सुद्धा चाहत्यांमध्ये ओळखली जाते.