जसे ५ नगरसेवकांसाठी रूसलात तसेच गोरगरीबांसाठी पुन्हा एकदा रूसा - गजानन काळे

नवी मुंबई, ९ जुलै : पारनेर नगरपंचायतीमधील शिवसेनेच्या पाचही नगरसेवकांची घरवापसी झाली आहे. 4 जुलै रोजी राष्ट्रवादी काँग्रेसमध्ये प्रवेश केलेले पाचही नगरसेवक शिवसेनेत परतले आहेत. पाचही नगरसेवकांनी मुंबईत मातोश्रीवर जाऊन मुख्यमंत्री उद्धव ठाकरे यांच्या उपस्थितीत पुन्हा शिवसेनेत प्रवेश केला. याआधी शिवसेना सचिव मिलिंद नार्वेकर यांच्यासह या पाचही नगरसेवकांनी उपमुख्यमंत्री अजित पवार यांची भेट घेतली आणि त्यांच्यासोबत 20 मिनिटं चर्चा केली होती.

शिवसेनेच्या पाचही नगरसेवकांनी अवघ्या चार दिवसांत घरवापसी केली आणि सात दिवसाच्या महानाट्यावर अखेर पडदा पडला. पाचही नगरसेवकांनी ‘मातोश्री’वर जाऊन मुख्यमंत्री उद्धव ठाकरे यांच्याशी चर्चा करून पुन्हा शिवबंधन बांधलं. तत्पूर्वी सर्व नगरसेवकांनी उपमुख्यमंत्री अजीत पवार यांची भेट घेतली. शिवसेना नेते मिलिंद नार्वेकर यांनी मंत्रालयात ही भेट घडवून आणली. अजीत पवार, पाच नगरसेवक, हसन मुश्रीफ यांच्यात अर्ध्या तास चर्चा झाली. नंतर राष्ट्रवादीचे आमदार निलेश लंके हे सर्व नगरसेवकांना मातोश्रीवर घेऊन आले होते.

दरम्यान मनसे नवी मुंबईचे शहराध्यक्ष गजानन काळे यांनी याच विषयाला अनुसरून त्याचा संदर्भ सध्याच्या कोरोना आपत्ती आणि सामान्य लोकांना होणाऱ्या त्रासाशी जोडून राज्य सरकारला एक पत्र लिहिलं आहे. त्यात त्यांनी म्हटलं आहे की, ‘जसे ५ नगरसेवकांसाठी रूसलात तसेच गोरगरीबांसाठी पुन्हा एकदा रूसा आणि महात्मा ज्योतिबा फुले जनआरोग्य योजनेचा लाभ सगळ्यां कोरोनाबाधित रूग्णांना देण्याचा निर्णय घ्या.’ अशी मागणी मनसे नेते गजानन काळे यांनी मुख्यमंत्र्यांकडे केली आहे.

महात्मा ज्योतिबा फुले जनआरोग्य योजना ही महाराष्ट्रातील गोरगरीब आणि असहाय्य जनतेस अनेक आजारांवर पुरेशी शासकीय मदत मिळवून देणारी एक उत्तम योजना आहे. मात्र हीच योजना कोरोनाबाधीत रूग्णांसाठी कुचकामी ठरत आहे. या योजनेतील अटीनुसार जर कोरोनाबाधीत रूग्ण व्हेंटीलेटरवर असेल तरच त्याला या योजनेचा लाभ मिळू शकतो. मात्र सरकारी आकडेवारीचा अभ्यास करता एकूण रूग्णांपैकी १/२ टक्का रूग्णांनाही व्हेंटीलेटरची आवश्यकता भासत नाही. याचाच अर्थ ही योजना महाराष्ट्रातील एकूण कोरोनाबाधीत रूग्णांच्या १ टक्का रूग्णांनाही फायद्याची ठरत नाही. त्यातच शासनाने राज्यातील प्रत्येक जिल्ह्यातील एक किंवा दोनच खाजगी रूग्णालये या योजनेखाली आणल्याने ग्रामीण भागातील जनतेला याचा अजिबात लाभ मिळू शकत नाही. असं मनसेने पत्रात म्हटलं आहे.

काय आहे नेमकं संपूर्ण पत्र;

मुख्यमंत्र्यांना माझे पत्र..

५ नगरसेवक परत आणायला रूसलात,
तसेच राज्यातील गोरगरीबांसाठी परत एकदा रूसा आणि महात्मा ज्याेतिबा फुले जनआरोग्य योजनेचा लाभ सगळ्या कोरोनाबाधीत रूग्णांना होऊ दया.@CMOMaharashtra @rajeshtope11 @TV9Marathi @saamTVnews @abpmajhatv @MiLOKMAT @zee24taasnews pic.twitter.com/bMYGsdQcxf

— Gajanan Kale MNS (@GajananKaleMNS) July 9, 2020

News English Summary: MNS leader Gajanan Kale has demanded the Chief Minister to take a decision to give the benefit of Mahatma Jyotiba Phule Janaarogya Yojana to all the corona affected patients.

News English Title: MNS Navi Mumbai President Gajanan Kale demand to implement Mahatma Jyotiba Phule Janaarogya Yojana to all corona patients News Latest Updates.