राज्यातील दूध उत्पादक शेतकऱ्यांच्या आंदोलनाला सुरुवात

नगर, २० जुलै : महाराष्ट्रातील दूध उत्पादक शेतकरी आर्थिक संकटात सापडला असून दुधाचे भाव १६ ते १८ रुपयांपर्यंत घसरले आहेत. या पार्श्वभूमीवर दूध दरात वाढ करण्याच्या मागणीसाठी शेतकरी संघटना आणि विरोधी पक्ष रस्त्यावर उतरले आहेत. अहमदनगर जिल्ह्यातील अकोले येथे दूध उत्पादक शेतकरी संघर्ष समितीच्या आंदोलनाला सुरुवात झाली आहे. यात अनेक शेतकरी संघटना आणि पक्षांनी सहभाग नोंदवला आहे. आंदोलनकर्त्यांनी दुधाला प्रतिलिटर 30 रुपये दर देण्याची मागणी केली आहे. यावेळी शेतकऱ्यांनी दगडाला दुधाचा अभिषेक घालून केंद्र आणि राज्य सरकारचा निषेध केला.

तसेच दररोज गावोगावी दूध संकलन केंद्रांवरही दगडाला दुधाचा अभिषेक करुन केंद्र आणि राज्य सरकारचा निषेध केला जाणार असल्याची माहिती आंदोलनकर्त्यांनी दिली. दरम्यान, भाजपाच्या वतीने आज सकाळी ११ वाजता संगमनेर प्रांताधिकाऱ्यांना निवेदन देऊन शेतकऱ्यांच्या दुधाला वाढीव दर देण्याची मागणी केली जाणार आहे.

दुधाला प्रति लीटर 30 रुपये दर द्या, केंद्र सरकारने घेतलेला दूध पावडर आयातीचा निर्णय तत्काळ मागे घ्या, दुधाला रास्त भाव मिळावा यासाठी सरळ शेतकऱ्यांच्या खात्यावर प्रति लिटर 10 रुपये अनुदान वर्ग करा, या प्रमुख मागण्यांसाठी राज्यभर अशा प्रकारे आंदोलन करण्यात येणार आहे.

डॉ. अजित नवले, दशरथ सावंत, महेश नवले, डॉ. संदिप कडलग, विजय वाकचौरे, शांताराम वाळुंज, रोहिदास धुमाळ, खंडू वाकचौरे, सुरेश नवले, शुभम आंबरे यांच्या प्रमुख उपस्थितीत या आंदोलनाला सुरुवात झाली आहे. रोज गावोगावी दूध संकलन केंद्रांवर दगडाला दुधाचा अभिषेक करून केंद्र व राज्य सरकारचा निषेध करणार, असल्याचेही संघटनेकडून सांगण्यात आले आहे.

News English Summary: Dairy farmers in Maharashtra are facing financial crisis and milk prices have come down to Rs 16-18. Against this backdrop, farmers’ unions and opposition parties have taken to the streets to demand an increase in milk prices.

News English Title: The milk agitation started in the state, the central and state government protested by anointing the stone News Latest Updates.