फडणवीसांवर केंद्रीय पातळीवर मोठी जवाबदारी मिळणार | बिहार विधानसभा निवडणूक मुख्य लक्ष

मुंबई, १४ ऑगस्ट : महाराष्ट्रात विधानसभेचे विरोधी पक्षनेते म्हणून काम पाहणाऱ्या भाजप नेते देवेंद्र फडणवीस यांच्यावर पक्षाकडून आणखी एक मोठी जबाबदारी सोपवली जाण्याची शक्यता आहे. बिहार विधानसभा निवडणूक जवळ आली असून या निवडणुकीसाठी देवेंद्र फडणवीस यांना भाजपकडून प्रभारीपद देण्यात येणार असल्याची माहिती भाजपच्या गोटातून मिळाली आहे.

बिहारमध्ये भाजपचे विद्यमान प्रभारी भूपेंद्र यादव यांच्यासोबत देवेंद्र फडणवीस काम पाहतील, असं समजतं. गुरुवारी झालेल्या कोअर कमिटीच्या बैठकीलाही फडणवीस उपस्थित होते, अशी माहिती आहे. लवकरच प्रभारीपदासाठी त्यांच्या नावाची अधिकृत घोषणा होणार आहे.

बिहारमध्ये निवडणुकीची जोरदार तयारी सुरु आहे. मुख्यमंत्री नितीश कुमार यांच्या जेडीयूसोबत भाजपा आघाडी करुन निवडणूक लढवत आहे. मात्र निवडणुकीत जास्तीत जास्त जागा जिंकण्याचा भाजपाचा प्रयत्न आहे. त्यामुळे प्रमुख नेत्यांना बिहारच्या निवडणुकीकडे लक्ष देण्यास सांगितले आहे. गेल्या अनेक दिवसांपासून देवेंद्र फडणवीस यांना केंद्रीय नेतृत्वात संधी देणार अशी चर्चा सुरु होती. त्याचाच एक भाग म्हणून बिहार निवडणूक प्रभारी म्हणून नेमणूक असल्याचं राजकीय वर्तुळात चर्चा आहे.

News English Summary: BJP leader Devendra Fadnavis, who is the Leader of Opposition in the Maharashtra Assembly, is likely to be given another major responsibility by the party.

News English Title: New responsibility from BJP to Devendra Fadnavis Will he be in charge in Bihar Assembly elections News Latest Updates.