महाविकास फोडाफोडी | नागपुरात अस्तित्व निर्माणासाठी शिवसेनेकडून मित्रपक्ष काँग्रेसला सुरुंग

नागपूर, २३ सप्टेंबर : काही दिवसांपूर्वी महाविकासआघाडीमध्ये राष्ट्रवादी आणि शिवसेनेत एकमेकांचे नगरसेवक, पदाधिकारी आणि कार्यकर्ते फोडाफोडीवरून मोठं वादळ निर्माण झालं होतं. कारण सत्तेत एकत्र असूनदेखील शिवसेनेच्या ५ नगरसेवकांनी राष्ट्रवादीत प्रवेश केला होता.

पारनेरच्या शिवसेनेच्या नगरसेवकांनी उपमुख्यमंत्री अजित पवार यांच्या उपस्थितीत हा पक्षप्रवेश झाला होता. नगरसेवक डॉ. मुद्दस्सीर सय्यद, नंदकुमार देशमुख, किसन गंधाडे, वैशाली औटी, नंदा देशमाने यांनी राष्ट्रवादीत प्रवेश करून आमदार लंके यांचे नेतृत्व स्वीकारले होते. याशिवाय शिवसेनेच्या काही पदाधिकाऱ्यांनीही प्रवेश केला होता. मात्र त्यानंतर शिवसेनेच्या वरिष्ठांनी नाराजी व्यक्त करत राष्ट्रवादिसोबत बैठक करून वाद मिटवला होता आणि संबंधित नेत्यांना पुन्हा शिवसेनेत प्रवेश दिला होता.

आता तसाच प्रकार शिवसेनेनं केला असून त्यांनी नागपूर काँग्रेसमध्ये पदाधिकाऱ्यांची फोडाफोडी केली आहे. नागपूर महापालिकेच्या राजकारणात सध्या काँग्रेस आणि भाजप हेच दोन प्रमुख पक्ष आहे. पण नागपुरात शिवसेना महाविकासआघाडीतील मित्रपक्ष असलेल्या काँग्रेसला सुरुंग लावत असल्याची चर्चा सध्या राजकीय वर्तुळात सुरु आहे. नुकताच नागपुरातील शहर काँग्रेस कमिटीचे महासचिव अंगद हिंदोरे यांच्यासह 50 ते 60 कार्यकर्त्यांनी शिवसेनेत प्रवेश केला आहे. शिवसेनेचे संपर्कप्रमुख आमदार दुष्यंत चतुर्वेदी यांच्या नेतृत्वात या काँग्रेस कार्यकर्त्यांनी भगवा झेंडा हाती घेतला आहे.

आगामी नागपूर महानगरपालिका निवडणुकीसाठी शिवसेना पक्षबांधणीसाठी जोरात प्रयत्न करत आहे. त्याचाच भाग म्हणून शिवसेनेनं काँग्रेसच्या प्रमुख कार्यकर्त्यांना आपल्या गळाला लावलं आहे. पण यामुळे नागपुरात शिवसेना आणि काँग्रेसमध्ये वादाची ठिंणगी पेटण्याची शक्यता वर्तवली जातं आहे.

News English Summary: In Nagpur, there is talk in the political circles that the Shiv Sena is undermining the Congress, an ally of the Mahavikasaghadi. Recently, 50 to 60 activists, including Angad Hindore, general secretary of the Nagpur City Congress Committee, have joined the Shiv Sena. Led by Shiv Sena liaison chief MLA Dushyant Chaturvedi, these Congress workers have taken up the Bhagva flag.

News English Title: Nagpur congress activist join Shivsena under leadership of MLA Dushyant Chaturvedi Marathi News LIVE latest updates.