फडणवीस पुन्हा येईन म्हणत होते | चंद्रकांत पाटील म्हणतात मी परत जाईन - उपमुख्यमंत्री

पुणे, २६ डिसेंबर: भारतीय जनता पक्षाचे राज्य प्रदेशाध्यक्ष चंद्रकांत पाटील यांनी आपण पुन्हा कोल्हापूरला जाणार असल्याचं जाहीर केलं आहे. पुण्यात देवेंद्र फडणवीस यांच्या उपस्थितीत पार पडलेल्या कार्यक्रमात चंद्रकांत पाटील यांनी हे वक्तव्य केलं. त्यांच्या या वक्तव्यावरुन उपमुख्यमंत्री अजित पवार यांनी टोला लगावला आहे.

“सरकार नाही त्यामुळे ते अस्वस्थ झाले आहेत. सुरुवातीला देवेंद्र फडणवीस पुन्हा येईन म्हणत होते. आता दुसरे म्हणतात मी परत जाईन. परत जाईन म्हणायला त्यांना कोणी पुणेकरांनी बोलवालंही नव्हतं. आमच्या भगिनी मेधा कुलकर्णी, कार्यकर्ते उगाच नाराज झाले,” असं अजित पवारांनी म्हटलं.

चंद्रकांत पाटील यांना २०१९ सालच्या विधानसभा निवडणुकीत कोल्हापूरऐवजी पुण्यातून तिकीट देण्यात आलं होतं. त्यामुळे स्थानिक भाजप उमेदवार मेधा कुलकर्णी नाराज झाल्याचीही चर्चा त्यावेळी झाली होती. यावरही अजित पवार यांनी भाष्य केलं.

“तुम्ही इथे आलात आणि आमदार झालात. तुमच्यामुळे इथल्या आमच्या भगिनी मेधा कुलकर्णी नाराज झाल्या. जनतेने निवडून दिलंय सेवा करायला आणि तुम्ही परत जायची भाषा करता. मग इथं आलातच कशाला?”, असा सवाल उपस्थित करत अजित पवार यांनी चंद्रकांत पाटील यांच्यावर जोरदार टीका केली आहे.

News English Summary: Bharatiya Janata Party state president Chandrakant Patil has announced that he will return to Kolhapur. Chandrakant Patil made this statement at a function held in the presence of Devendra Fadnavis in Pune. Deputy Chief Minister Ajit Pawar has lashed out at his statement.

News English Title: Deputy Chief Minister Ajit Pawar slams BJP leader Chandrakant Patil news updates.