भाजपचे आमदार एकत्र ठेवण्यासाठी फडणवीस तसे भाषण करत असतील - संजय राऊत

मुंबई, १२ एप्रिल: देवेंद्र फडणवीस यांनी पंढरपूर-मंगळवेढा विधानसभा पोटनिवडणुकीच्या निमित्ताने मंगळवेढा येथे जनतेला संबोधित केले. यावेळी ते म्हणाले की, ‘आम्ही नेहमी म्हणायचो महाराष्ट्रात लोकशाही आहे, पण आता लोकशाहीऐवजी लॉकशाही चालू आहे…म्हणजेच लॉकडाऊन’, हे लॉक करायचे, ते अनलॉक करायचे असेच सुरू आहे. देशभरातून सर्वाधिक मृत्यूही महाराष्ट्रात आहे. मात्र, ही परिस्थिती हाताळण्यास सरकार अपयशी ठरले आहे. त्यामुळेच लॉकडाऊन करण्यात येत आहे. कष्टकरी, शेतकऱ्यांना आर्थिक पॅकेज न देता लॉकडाऊनचा निर्णय घेतला जात आहे. पॅकेजशिवाय करण्यात येणाऱ्या लॉकडाऊनला आमचा विरोध आहे’ असे देवेंद्र फडणवीस म्हणाले.

त्यानंतर फडणवीस यांनी पंढरपूरच्या मंगळवेढ्यामध्ये प्रचारसभेत बोलताना सूचक विधान केलं आहे. “लोकं मला विचारतात एका मतदारसंघाच्या निवडणुकीमुळे काय फरक पडणार आहे? याने काय सरकार बदलणार आहे का? मी म्हणतो सरकार कधी बदलायचंय ते माझ्यावर सोडा. ते बदलू आपण. पण या सरकारला त्यांची जागा दाखवून देण्याची पहिली संधी मंगळवेढ्याच्या मतदारांना मिळाली आहे”, असं फडणवीस यावेळी म्हणाले.

फडणवीसांच्या विधानावर संजय राऊत यांनी देखील प्रतिउत्तर दिलं आहे. एका मतदारसंघाच्या निवडणुकीने काय फरक पडणार आहे, त्याने काय सरकार बदलणार आहे का, असे अनेकांना वाटत असेल. पण, सरकार कधी बदलायचं ते माझ्यावर सोडा, सरकारला जागा दाखवून देण्याची पहिली संधी मंगळवेढा-पंढरपूर मतदारसंघाला आहे, असे देवेंद्र फडणवीस यांनी म्हटले होते. फडणवीसांच्या या वक्तव्याला राऊत यांनी प्रत्युत्तर देताना, सरकार पाडल्यानंतर आम्ही तुमचं अभिनंदन करू, असे म्हटलंय.

सत्ता बदलाचं आम्ही त्यांच्यावरच सोडलंय आम्ही. पण, त्यांनी पंढरपूरात जाऊन हे विधान केल्यामुळे प्रत्यक्ष विठोबा-माऊलीसुद्धा अत्यंत सावध झाली असेल. पण, विठु-माऊलीचा आशीर्वाद आमच्यासोबत आहे. विरोधी पक्षाला अशी भाषणं करावीच लागतात. यापूर्वी आम्हीही अशी भाषणं केलेली आहेत, लोकांमध्ये उत्साह आणण्यासाठी, त्यांचे आमदार एकत्र ठेवण्यासाठी देवेंद्र फडणवीस तसे भाषण करत असतील, असे संजय राऊत यांनी म्हटले.

News English Summary: Sanjay Raut has also responded to Fadnavis’ statement. We have made such speeches before, Devendra Fadnavis may be giving such speeches to bring enthusiasm among the people, to keep their MLAs together, said Sanjay Raut.

News English Title: Shivsena MP Sanjay Raut reply to Devendra Fadnavis after his statement at Pandharpur Mangalvedha news updates.