मीरारोडचे रहिवासी मेजर कौस्तुभ राणे यांच्या हौतात्म्यामुळे शहर शोकाकुल, पण भाजप नेते पार्टीत दंग

मीरारोड : काश्मीरमध्ये दहशतवाद्यांशी लढताना ३ भारतीय जवानांसह मेजर कौस्तुभ राणे शहीद झाल्यानं सर्वत्र शोककळा पसरली असताना मीरारोडचे स्थानिक भाजप नेते पार्टीत दंग झाले आहेत. भाजपचे स्थानिक नगरसेवक आनंद मांजरेकर यांचा वाढदिवस स्थानिक नेतेमंडळी तसेच आमदारांनी एकदम धुमधडाक्यात साजरा केला आहे.

केवळ पार्टीचं नाही तर अगदी डिजेच्या दणदणाटात करत स्थानिक भाजपने नगरसेवक आनंद मांजरेकर यांचा वाढदिवस साजरा केला. ज्या ठिकाणी ही पार्टी आयोजित करण्यात आली होती तिथून शहीद मेजर राणे यांचं घर एका हाकेच्या अंतरावर असल्याचं समोर आलं आहे. त्यामुळे स्थानिक भाजप प्रतिनिधींना या विषयच किती गांभीर्य आहे ते स्पष्ट होत आहे.

या समारंभात मीरारोड महानगरपालिकेच्या महापौर डिंपल मेहता, स्थानिक आमदार नरेंद्र मेहता यांच्यासह भाजपचे अनेक स्थानिक नगरसेवक आणि पदाधिकारी उपस्थित होते. विशेष म्हणजे या सर्वांनी सोशल मीडियावर शहीद राणे यांना आदरांजली वाहणाऱ्या पोस्ट टाकल्या होत्या. मात्र सोशल मीडियावर श्रद्धांजली वाहून दुसऱ्या बाजूला या कार्यक्रमातील हेच भाजपचे नेते स्वतःच आनंदाने समाजमाध्यमांवर पोस्ट टाकून पार्टीचे अपडेट्स देत होते. भाजपा नेत्यांच्या या वागणुकीमुळे संपूर्ण मीरारोड शहरात संताप व्यक्त करण्यात येत आहे.