१० हजारांहून अधिक रकमेसाठी ATM मागणार ओटीपी

मुंबई : रिझर्व्ह बँक ऑफ इंडियाच्या निर्देशांनंतर आता एटीएमचे फ्रॉड थांबवण्यासाठी बँकांनी विविध पावले उचलायला सुरुवात केली आहे. कॅनरा बँकेने एटीएममधून कार्डद्वारे १० हजार रुपयांपेक्षा अधिक रक्कम काढताना ग्राहकांना ओटीपी बंधनकारक केला आहे. म्हणजेच एटीएममधून तुम्हाला दहा हजारांपेक्षा अधिक रक्कम काढायची असेल तर पासवर्डसोबत ओटीपी क्रमांकही द्यावा सूत्रांनुसार, आता अन्य बँकादेखील कॅनरा बँकेप्रमाणेच हा ओटीपीचा नियम करण्याची शक्यता आहे.

स्टेट बँक ऑफ इंडियाच्या एका वरिष्ठ अधिकाऱ्यांच्या म्हणण्यानुसार, आरबीआयच्या निर्देशांचे सर्व बँकांना पालन करायचे आहे. आरबीआयने हे स्पष्ट सांगितले आहे की एटीएमद्वारे होणारी फसवणूक रोखायला हवी. एटीएम फसवणुकीचे प्रकार रात्री ११ पासून सकाळी ६ वाजेपर्यंत सर्वाधिक होतात. एटीएममधून फसवणुकीचे प्रकार हे रात्री 11 ते सकाळी 6 च्या दरम्यान अधिक होतात. रिझर्व्ह बँकेच्या सर्व आदेशांचे आम्हाला पालन करावे लागणार आहे. तसेच एटीएममधून होणारे फसवणुकीचे प्रकार थांबवावे असं रिझर्व्ह बँकेने स्पष्ट केल्याची माहिती,” स्टेट बँक ऑफ इंडियाच्या एका वरिष्ठ अधिकाऱ्याने दिली.

यापूर्वी एटीएममधील फसवणुकीचे प्रकार रोखण्यासाठी दिल्ली स्टेट लेव्हल बँकर्स कमिटीने (SLBC) काही उपाय सुचवले होते. त्यांनी एटीएमच्या दोन ट्रान्झॅक्शनदरम्यानचा कालावधी हा ६ ते १२ तासांचा असावा, असा पर्याय सुचवण्यात आला होता. २०१८-१९ मध्ये दिल्लीत एटीएममधून फसवणुकीची १७९ प्रकरणे समोर आली होती. तर महाराष्ट्रातूनही २३३ प्रकरणं समोर आली होती. काही महिन्यांपूर्वी एटीएम कार्डच्या क्लोनिंगचीही प्रकरणे समोर आली होती. यामध्ये मोठ्या प्रमाणात परदेशी नागरिकांचा समावेश होता. गेल्या वर्षात देशभरात फसवणुकीच्या प्रकारत वाढ होऊन ९८० प्रकरणे समोर आली होती. त्यापूर्वी एटीएमद्वारे फसवणुकीची ९११ प्रकरणे उघड झाली होती.

Disclaimer: म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.