पंकजा मुंडेचं वर्चस्व असलेल्या बँकेच्या चेअरमनला लाच घेताना अटक

बीड, १९ ऑक्टोबर : भ्रष्टाचाराच्या प्रकरणात मागील 2 वर्षापासून गाजत असलेल्या वैद्यनाथ बँकेचे चेअरमन अशोक जैन यांना तब्बल दहा लाख रुपयांची लाच घेताना लाच लुचपत विभागाने रंगेहाथ पकडले आहे. या घटनेमुळे बीड जिल्ह्यासह राज्यात एकच खळबळ उडाली आहे. ही कारवाई आज अशोक जैन यांच्या परळी येथील राहत्या घरी करण्यात आली. औरंगाबाद लाच लुचपत विभागाच्या अधिकाऱ्यांनी सापळा रचून धाड टाकली तेव्हा हा संपूर्ण प्रकार उजेडात आला.

वैद्यनाथ बँकेने कळंब येथील बँकेच्या एका सभासदाला अंदाजे अडीच कोटी रुपयांचे कर्ज प्रकरण मंजूर केले असल्याचे समजते. आणि त्या प्रकरणी चेअरमन अशोक जैन यांनी 15 लाख रुपयांची लाच मागितली होती. तक्रारदार यांनी याप्रकरणी औरंगाबाद लाच लुचपत प्रतिबंधक विभागाकडे धाव घेत तक्रार दिली. त्यानंतर आज 15 लाखाच्या रक्कमेपैकी 10 लाख रुपये आज दुपारी दोनच्या सुमारास अशोक जैन यांच्या निवासस्थानी देण्याचे ठरले होते.

ठरलेल्या वेळेनुसार, तक्रारदार 10 लाखांची रक्कम घेऊन अशोक जैन यांच्या घरी पोहोचला. त्यावेळी औरंगाबाद येथील लाच लुचपत विभागाच्या अधिकाऱ्यांनी अचानक धाड टाकली. यावेळी 10 लाखांची लाच घेत असताना अशोक जैन यांना रंगेहात पकडण्यात आले. या प्रकरणी परळी पोलीस ठाण्यात जैन यांच्या विरोधात गुन्हा दाखल करण्याची प्रक्रिया सुरू आहे. वैद्यनाथ सहकारी बँकही भाजपच्या नेत्या पंकजा मुंडे यांच्या ताब्यात आहे.

News English Summary: Ashok Jain, chairman of Vaidyanath Bank, who has been involved in corruption cases for the last two years, has been caught red-handed by the bribery department while accepting a bribe of Rs 10 lakh. The incident has caused a stir in the state, including Beed district. The operation was carried out at Ashok Jain’s residence in Parli today. The whole thing came to light when the Aurangabad Bribery and Corruption Department officials set a trap.

News English Title: Vaidyanath Bank Chairman Ashok Jain caught red handed taking bribe of rupees 10 lakhs in Beed News updates.