ऑक्सिजनअभावी होणारे मृत्यू हे गुन्हेगारी कृत्य असून ते नरसंहारापेक्षा कमी नाही - अलाहाबाद हायकोर्ट

अलाहाबाद, ५ मे | ऑक्सिजन पुरवठ्यासाठी जबाबदारी असणाऱ्यांना अलाहाबाद हायकोर्टाने चांगलंच फटकारलं आहे. रुग्णालयात ऑक्सिजनअभावी करोना रुग्णांचा मृत्यू होणं गुन्हेगारी कृत्य असून नरसंहारापेक्षा कमी नाही अशा शब्दांत हायकोर्टाने सुनावलं आहे. न्यायमूर्ती सिद्धार्थ वर्मा आणि अजित कुमार यांच्या खंडपीठासमोर सुनावणी सुरु होती. लखनऊ आणि मेरठमध्ये ऑक्सिजनअभावी होणाऱ्या करोना रुग्णांच्या मृत्यूसंबंधी समाज माध्यमांवर व्हायरल होणाऱ्या पोस्टची दखल घेताना खंडपीठाने हा निष्कर्ष नोंदवला.

ऑक्सिजनचा पुरवठा न झाल्याने करोना रुग्णांचा मृत्यू होणं आमच्यासाठी वेदनादायी आहे. वैद्यकीय ऑक्सिजनची खरेदी आणि पुरवठा साखळी सुनिश्चित करण्याची जबाबदारी सोपवण्यात आलेल्यांकडून करण्यात आलेलं हे गुन्हेगारी कृत्य असून नरसंहारापेक्षा कमी नाही,” अशा शब्दांत हायकोर्टाने संताप व्यक्त केला.

विज्ञान इतकं प्रगत झालं आहे की, ह्रदय प्रत्यारोपण आणि ब्रेन सर्जरी होत आहेत. अशा परिस्थितीतही आम्ही लोकांना मरण्यासाठी कसं काय सोडू शकतो,” अशी विचारणा यावेळी न्यायालयाने केली. कोर्टाने यावेळी लखनऊ आणि मेरठचे जिल्हा दंडाधिकारी यांना या वृत्तांसंबंधी चौकशी करत ४८ तासांत रिपोर्ट सादर करण्याचा आदेश दिला आहे.

दुसरीकडे दिल्लीतील परिस्थितीवर देखील दिल्ली उच्च न्यायालयात सुनावणी झाली. देशभरात कोरोनाबाधितांची संख्या नवीन उच्चांक गाठत आहे. कोरोनाच्या वाढत्या प्रादुर्भावाच्या पार्श्वभूमीवर रेमडेसिवीर इंजेक्शन, ऑक्सिजन, बेड्स, कोरोना लसीची कमतरता जाणवत आहे. ऑक्सिजन कमतरतेमुळे अनेकांचे रुग्णांचा मृत्यू झाला आहे. यासंदर्भात सर्वोच्च न्यायालयासह देशातील अनेक हायकोर्टात सुनावणी सुरू आहे. दिल्ली हायकोर्टात झालेल्या सुनावणीवेळी पुन्हा एकदा दिल्ली उच्च न्यायालयाने केंद्र सरकारला फटकारले असून, तुम्ही डोळेझाक करू शकता, आम्ही नाही, असे म्हटले आहे.

यावेळी केंद्र सरकार ऑक्सिजन पुरविण्याबाबतचं आश्वासन पूर्ण करण्यात अपयशी ठरलंय असं हायकोर्टाने स्पष्ट म्हटल्याने मोदी सरकारची मोठी राजकीय कोंडी झाली आहे. दिल्लीसह अनेक ठिकाणच्या रुग्णांचा मृत्यू हा ऑक्सिजनच्या कमतरेतमुळे झाल्याचे अॅमिकस क्युरी यांनी न्यायालयाच्या निदर्शनास आणून दिले. यावर, महाराष्ट्रात आताच्या घडीला ऑक्सिजनचा पुरवठा पुरेसा असून, तेथील काही ऑक्सिजन टँकर दिल्लीत पाठवले जाऊ शकतात, असा सल्ला न्यायालयाने दिला.

News English Summary: The death of corona patients due to lack of oxygen supply is painful for us. It is a criminal act committed by those entrusted with the task of ensuring the supply and supply of medical oxygen and is nothing less than genocide, ”the High Court said in a statement.

News English Title: Allahabad court slams Uttar Pradesh govt over corona pandemic oxygen shortage news updates.

Disclaimer: म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.