धक्कादायक! मुस्लिम तरुणाची टोपी काढली व जय श्रीराम बोलण्यास सांगून जबर मारहाण

गुरुग्राम : येथे काही अज्ञात तरुणांनी एका २५ वर्षीय मुस्लिम युवकाला जबर मारहाण केल्याची घटना समोर आली आहे. तरुणाने पारंपारिक टोपी घातली असल्याने ही मारहाण करण्यात आल्याचं स्थानिक पोलीस अधिकाऱ्यांनी सांगितलं आहे. मोहम्मद बरकत आलम असं या तरुणाचं नाव असून तो मुळचा बिहारचा आहे. गुरुग्राम येथील जकोब पुरा परिसरात तो राहतो.

आलम याने स्थानिक पोलीस तक्रारीत दिलेल्या माहितीनुसार, सदर बाजार परिसरात काही अज्ञात टवाळ तरुणांनी त्याला घेरलं आणि त्याने घातलेल्या पारंपारिक टोपीवर आक्षेप घेतला. ‘आरोपींनी मला धमकावलं. या परिसरात टोपी घालण्याची परवानगी नाही असं ते मला दम देऊन सांगू लागले. त्यानंतर त्यांनी माझी टोपी बळजबरीने काढली आणि माझ्या कानाखाली लगावली. यावेळी त्यांनी मला जोरजोरात भारत माता की जय अशी घोषणा देण्यास देखील सांगितलं’, अशी माहिती आलमने दिली आहे.

पुढे त्याने सांगितलं की, ‘मी त्यांनी सांगितल्याप्रमाणे भारत माता की जय घोषणा दिली. नंतर त्यांनी मला जोरजोरात जय श्रीराम बोलण्यास सांगितलं, ज्यासाठी मी नकार दिला. यावेळी त्यांनी रस्त्यावरुन काठी उचलली आणि मला मारहाण करण्यास सुरुवात केली. त्यांनी माझे पाय आणि पाठीवर खूप फटके दिले’. आलम याने सदर बाजार येथील मशिदीतून नमाज पठण करुन परतत असताना हा प्रकार घडल्याचं पोलिसांना सांगितलं आहे. आपण मदतीसाठी आरडाओरड केल्यानंतर आपल्याच समाजातील काही लोक धावत आले. नंतर आरोपींनी पळ काढला अशी माहिती आलमने दिली आहे. पोलिसांनी याप्रकरणी गुन्हा दाखल केला असून आलमची वैद्यकीय चाचणी केली जात आहे. आरोपींची ओळख पटवण्यासाठी सीसीटीव्हीची मदतदेखील घेतली जात आहे.

Gurugram: A man says he was assaulted in Sadar Bazar by 5-6 youths for wearing traditional skull cap last night; says, “One of them threatened me, saying wearing cap was not allowed in the area. I said I am coming back after offering namaz. They removed my cap & slapped me.” pic.twitter.com/LQlJ8IZzLn

— ANI (@ANI) May 27, 2019