पासवर्ड बदला! फेसबुकवर तब्बल ५ कोटी अकाऊंट हॅक, सर्वाधिक भारतीय अकाउंट

वॉशिंग्टन : फेसबुकवरील तब्बल पाच कोटी अकाऊंट हॅक झाल्याचे वृत्त आहे. विशेष म्हणजे हॅक झालेल्या अकाऊंटमध्ये सर्वाधिक भारतीय अकाऊंटचा समावेश असल्याची माहिती पुढे येत आहे. हॅकर्सनी फेसबुकच्या “View As” या सुविधेच्या सुरक्षेतील उणीवांचा नेमका फायदा उचलत फेसबुक अकाऊंट हॅक केल्याची माहिती स्वतः कंपनीचे सीईओ मार्क झुकेरबर्ग यांनी प्रसिद्ध केली आहे.

फेसबुकवरील सुरक्षेच्या कारणास्तव केल्या गेलेल्या अनेक उपाययोजनेअंतर्गत अजून ४ कोटी फेसबुक अकाऊंट प्रभावित झाल्याचं झुकेरबर्ग यांनी पत्रकार परिषदेत मान्य केलं आहे. मोठ्या प्रमाणावर अकाउंट्स हॅक झालेली ५ कोटी खाती नेमकी कोणत्या देशातील आणि त्यांचा नेमका आकडा काय हे समजू शकलेलं नाही.

फेसबुकच्या अधिकृत माहितीनुसार फेसबुकचे जगभरात २ अब्जाहून अधिक वापरकर्ते आहेत आणि त्यात सर्वाधिक आकडा भारतातील असून तो २७ कोटी इतका मोठा आहे. त्यामुळेच हॅक झालेल्या अकाउंट्स मध्ये सर्वाधिक मोठा आकडा हा भारतातीलच असण्याची शक्यता वर्तविण्यात येत आहे.