कायदे रद्द न केल्यास ४० लाख ट्रॅक्टर घेऊन संसदेला घेराव - राकेश टिकैत

नवी दिल्ली, २३ फेब्रुवारी: केंद्र सरकारने २० सप्टेंबर २०२० रोजी कृषी क्षेत्राशी संबंधित तीन कायदे मंजूर केले होते. त्या कायद्यांना शेतकऱ्यांचा विरोध आहे आणि त्यासाठीच हे आंदोलन सुरू आहे. आजपर्यंत सरकार आणि शेतकऱ्यांमध्ये चर्चेसाठी ११ बैठकी झाल्या तरीही कोणता तोडगा निघताना दिसत नाही, हा निषेध चालू ठेवण्यासाठी आम्ही नवीन रणनीती बनवत आहोत असे शेतकऱ्यांनी यावेळी सांगितले.

केंद्र सरकारने कृषी कायदे मागे घेतले नाही, तर आता संसदेला घेराव घातला जाईल. त्यावेळी चार लाख नाही, तर चाळीस लाख ट्रॅक्टर येतील. शेतकऱ्यांनी तयार राहावे. कोणत्याही क्षणी दिल्लीला येण्याचे आवाहन केले जाऊ शकते, असे राकेश टिकैत यांनी यावेळी बोलताना सांगितले.

दरम्यान, कृषी क्षेत्राशी संबंधित कायद्यांविरोधात सुरू असलेले शेतकर्‍यांचे आंदोलन आणखी तीव्र होत आहे. २३ ते २८ फेब्रुवारीदरम्यान ‘पगडी संभाल दिवस’ आणि ‘दमन विरोधी दिवस’ यांचे आयोजन करण्यात आले आहे. मंगळवारी शेतकरी बिलाचा निषेध करण्यासाठी शेतकरी ‘पगडी संभाल दिवस’ साजरा करत आहेत.

पीटीआयने दिलेल्या वृत्तानुसार, संयुक्त किसान मोर्चाने (एसकेएम) २३ फेब्रुवारीला ‘पगडी संभाल दिवस’ आणि २४ फेब्रुवारीला ‘दमन विरोधी दिवस’ साजरा करणार असल्याचे सांगितले आहे. शेतकऱ्यांविषयी आदर ठेवावा आणि त्यांच्याविरोधात दडपशाहीचे उपाय केले जाऊ नयेत म्हणूनच या दिवसांचे आयोजन केले आहे.

News English Summary: If the central government does not repeal the Agriculture Act, then Parliament will now be besieged. At that time, not four lakh, but forty lakh tractors will come. Farmers should be ready. An appeal can be made to come to Delhi at any time, said Rakesh Tikait.

News English Title: Farmers leader Rakesh Tikait said protesting farmers will march towards parliament news updates.