मनसे 'हिंदुत्वा'मुळे शिवसेनेला खिंडार; सुहास दाशरथेंचा मनसेत प्रवेश

मुंबई: महाराष्ट्र नवनिर्माण सेना हिंदुत्वाच्या मार्गाने गेल्याने शिवसेनेला धक्के लागण्यास सुरुवात झाली आहे असंच म्हणावं लागेल. मनसे आता हिंदुत्वाचा अजेन्डा हाती घेणार असल्याने शिवसेनेला सर्वाधिक नुकसान होण्याची शक्यता वर्तविण्यात आली आहे. दरम्यान, शिवसेनेचे औरंगाबादचे सहसंपर्क प्रमुख तथा लोकसभा संघटक सुहास दाशरथे यांनी महाराष्ट्र नवनिर्माण सेनेत प्रवेश केला आहे. कृष्णकुंज येथे राज ठाकरे यांच्या उपस्थितीत शेकडो पदाधिकाऱ्यांच्या सहित त्यांनी मनसेत प्रवेश केला आहे.

#मनसे_महामोर्चा च्या पूर्वसंध्येला मनसे अध्यक्ष श्री.राजसाहेब ठाकरे ह्यांच्या उपस्थितीत श्री. प्रकाश महाजन, माजी आमदार श्री. हर्षवर्धन जाधव, औरंगाबाद शिवसेना नेते श्री. सुहास दशरथे, नांदेडचे शिवसेना जिल्हाप्रमुख श्री. प्रकाश कौदगे ह्यांचा महाराष्ट्र नवनिर्माण सेनेत जाहिर प्रवेश. pic.twitter.com/gIQt62698Z

— MNS Adhikrut (@mnsadhikrut) February 8, 2020

सुहास दाशरथे मागील ३९ वर्ष शिवसेनेत कार्यरत होते आणि शिवसेना नेते चंद्रकांत खैरे यांचे कट्टर समर्थक अशी त्यांची ओळख आहे. दाशरथेंचा मनसे प्रवेश हा खैरे यांच्यासाठी मोठा राजकीय धक्का असल्याची चर्चा औरंगाबादमध्ये रंगली आहे.

विशेष म्हणजे हिंदुत्वाच्या वाटेने गेल्यानंतर मनसेला फायदा होताना दिसत असून, शिवसेनेला सत्तेत असतानाही धक्के बसत असल्याचं दिसत आहे. दरम्यान, राज ठाकरे यांच्या हिंदुत्वाच्या मुद्यामुळे प्रवेश करणार असल्याचे सुहास दशरथे यांनी आधीच स्पष्ट केलं होतं. काही दिवसांपूर्वी त्यांनी कृष्णकुंजवर जाऊन मनसेप्रमुख राज ठाकरे यांची भेट घेतली होती.

शिवसेनेने कॉग्रेस-राष्ट्रवादी सोबत जात राज्याची सत्ता हस्तगत केल्यापासून अनेक जुन्या पदाधिकारी, कार्यकर्त्यांमध्ये नाराजी असल्याची चर्चा होती. औरंगाबाद शिवसेनेतून त्याचे पडसाद उमटायला सुरूवात झाली असून जुने कार्यकर्ते आणि सहसंपर्क प्रमुख असलेले सुहास दाशरथे लवकरच मनसेमध्ये प्रवेश करणार हे तेव्हाच राज ठाकरे यांच्या भेटीनंतर निश्चित झालं होतं.

त्यावेळी प्रसार माध्यमांशी संवाद साधताना ते म्हणाले होते की, ‘मागील ३९ वर्ष मी शिवसेनेत काम करत आहे, पण पक्षाकडून माझ्यावर सातत्याने अन्यायच होत गेला आणि काँग्रेस-राष्ट्रवादीसोबत सत्तेत सामील झाल्याने औरंगाबादमध्ये शिवसेना संकटात असल्याचं सूचित केलं होतं. दरम्यान, उद्याच्या महामोर्चाला देखील औरंगाबादमधून मोठया प्रमाणावर कार्यकर्ते येणार असल्याचं वृत्त आहे. त्यानंतर राज ठाकरे मराठवाड्याच्या दौऱ्यावर जाणार असून त्यावेळी औरंगाबादमध्ये शक्तिप्रदर्शन करून महानगरपालिका निवडणुकीच्या निमीत्ताने रणशिंग फूंकल जाणार आहे आणि त्यात थेट एमआयएम’ला शिंगावर घेण्याची योजना आहे.

Web Title:  Aurangabad Shvsena Leader Suhas Dashrathe join MNS in Presence of MNS Chief Raj Thackeray.

Disclaimer: म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.