फडणवीस म्हणाले केंद्राने अतिशय तर्कशुद्ध व्यवस्था उभी केली | कोर्ट म्हणालं होतं बुद्धीचा जराही वापर केला नाही

नाशिक, ३० एप्रिल | राज्याचे विरोधी पक्षनेते देवेंद्र फडणवीस यांनी आज (शुक्रवारी) नाशिक येथील सिव्हिल रूग्णालयास भेट देऊन, नाशिकमधील परिस्थितीचा आढावा घेतला. यानंतर त्यांनी माध्यम प्रतिनिधींनी विचारलेल्या विविध प्रश्नांना उत्तरं दिली.

माध्यमांशी बोलताना फडणवीस म्हणाले, “माझ्यापरीने होईल ते मी राज्यासाठी करतच असतो, केंद्र सरकारने रेमडेसिविरचा सर्वाधिक साठा हा राज्याला दिला. ऑक्सिजनचा सर्वात मोठा साठा महाराष्ट्राला दिला. जवळ जवळ पहिल्याच खेपेत ११०० व्हेंटिलेटर हे महाराष्ट्राला दिले. आता पीएसए प्लॅन्ट देखील मोठ्याप्रमाणात महाराष्ट्राला दिले. त्यामुळे मला असं वाटतं की राज्य व केंद्रामध्ये कुठेही समन्वयाचा अभाव अशा प्रकारची अवस्था नाही.

केंद्र सरकारने अतिशय तर्कशुद्ध व्यवस्था उभी केली आहे. तीच राज्याने देखील केली पाहिजे. वारंवार केंद्राकडे बोट दाखवून चालणार नाही. आपल्या सर्वांना एकत्रित काम करावं लागणार आहे. पंतप्रधान मोदींनी वारंवार सांगितलं आहे की आज एकत्रितपणे जनतेच्या पाठीशी आपण उभं राहायला हवं. म्हणून माझंही मत स्पष्ट आहे कोणी कुणाकडे बोट दाखवणं योग्य नाही, आपल्याकडे उपलब्ध संसाधनांचा योग्य वापर आपण करायला हवा.

दरम्यान, कोरोना आपत्तीत फडणवीसांकडून केंद्राची पाठ थोपटण्याचा प्रकार घडला असला तरी न्यायालयाने मात्र अगदी त्याविरुद्ध मत नोंदवलं होतं. दिल्ली उच्च न्यायालयाने केंद्राने केलेल्या व्यवस्थेवरून आणि नियमांवरून कडक शब्दात ताशेरे ओढले होते. न्यायमूर्ती प्रतिभा एम. सिंह यांनी केंद्र सरकारच्या कारभारावर नाराजी व्यक्त करताना, ‘हे चुकीचं आहे. नियम बनवता बुद्धीचा अजिबात वापर करण्यात आलेला नाही असं वाटतंय. ज्यांच्याकडे ऑक्सिजनची सुविधा नाहीय अशा ठिकाणी रेमडेसिविर औषध दिलं जाणार नाही. लोकांनी मरत रहावं अशीच तुमची इच्छा आहे, असं यावरुन वाटतंय,” असं मत नोंदवलं होतं.

News English Summary: The central government has set up a very rational system. The same should be done by the state. Frequent pointing to the center will not work. We all have to work together. Prime Minister Modi has repeatedly said that today we must stand together with the people. So my opinion is clear, it is not right to point the finger at anyone, we should make proper use of the resources available to us.

News English Title: Devendra Fadnavis press conference at Nashik over corona pandemic news updates.