VIDEO - स्वीटी सातारकर' चित्रपटाचा याड लावणारा टीजर आणि धमाकेदार गाणं

मुंबई: काही दिवसांपूर्वी अभिनेता संग्राम समेळनं स्वीटी सातारकर नामक तरुणी त्याला सतत मेसेजेस पाठवून हैराण करत असल्याची तक्रार सोशल मीडियात पोस्ट टाकून केली होती. त्यामुळे ही स्वीटी सातारकर कोण असा प्रश्न निर्माण झाला होता. या स्वीटी सातारकरचा पत्ता आता सापडला आहे. स्वीटी सातारकर या चित्रपटाचा धमाल टीजर सोशल मीडियाद्वारे सादर करण्यात आला आहे.

मुनाफ नाईक, संतोष साबळे यांनी निर्मिती केलेल्या या चित्रपटाचं दिग्दर्शन शब्बीर नाईक यांनी केलं आहे. सुमित गिरी यांनी चित्रपटाचं लेखन, संतोष मुळेकर यांनी संगीत दिग्दर्शन, फैसल महाडिक यांनी संकलन, मंगेश कांगणे आणि सुहास सावंत यांनी गीतलेखन केलं आहे. चित्रपटात अमृता देशमुख, संग्राम समेळ, विजय निकम, गौरी जाधव, वंदना वाकनीस, पुष्कर पुष्कर लोणारकर, विनम्र भाबल, प्रशांत विचारे अशी दमदार स्टारकास्ट आहे.

‘नाद नको दादा, पाठीशी बाय माझी… स्वीटी!’ असे मजेदार शब्द असलेलं ‘स्वीटी सातारकर’ या चित्रपटातलं गाणं सोशल मीडियाद्वारे लाँच करण्यात आलं आहे. उडत्या चालीचं ताल धरायला लावणारं हे गाणं सोशल मीडियावर हिट होत आहे.

अत्यंत अतरंगी अशा स्वीटी सातारकर या तरुणीची गोष्ट या चित्रपटात मांडण्यात आली आहे. एका तरुणाच्या मागे लागलेल्या या स्वीटी सातारकरला तो तरुण मिळतो का अशी गोष्ट या चित्रपटात आहे. चित्रपटाचा टीजर आणि धमाकेदार गाण्यामुळे हा चित्रपट पुरेपूर मनोरंजक आणि फ्रेश दिसतो आहे. त्यामुळे या चित्रपटाकडे आता चित्रपटप्रेमींचं लक्ष लागलं आहे.