वृक्ष लागवडीत भ्रष्टाचार करुन मुनगंटीवारांनी ५०० कोटींचा बंगला बांधला: अमोल मिटकरी

मुंबई: महाराष्ट्रात शिवसेना, एनसीपी आणि काँग्रेस महाविकास आघाडीचे सरकार स्थापन झाल्यापासून भारतीय जनता पक्षाच्या नेत्यांवर सत्ताधारी पक्षातील नेतेमंडळीकडून विविध मुद्यांवरून आरोप केले जात आहे. त्यात आता भारतीय जनता पक्षाचे नेते आणि माजी वनमंत्री सुधीर मुनगंटीवार यांच्यावर वृक्ष लागवडीत मोठा भ्रष्टाचार असल्याचा आरोप करण्यात येत आहे. एनसीपीचे सरचिटणीस अमोल मिटकरी यांनी हे आरोप केले आहे. ठाण्यातील एका जिमच्या उदघाट्न कार्यक्रमात ते बोलत होते.

काल बदलापूर येथे कॅ.आशिष दामले यांनी सुरु केलेल्या अजितदादा फिटनेस सेंटर चा उदघाटन सोहळा मोठ्या थाटात पार पडला. श्री. दामले यांच्या सामाजिक उपक्रमाचा आवाका खुप मोठा आणि गोरगरिबांच्या हिताचा ! 10रु.मध्ये जेवणाची थाळी हा राज्यातील पहिला उपक्रम सुप्रियाताई च्या नावाने ताईज किचन pic.twitter.com/GzujerBlGS

— Amol mitkari (@amolmitkari22) January 28, 2020

अमोल मिटकरी म्हणाले, “सर्वात आधी सुधीर मुनगंटीवार यांच्या घराची चौकशी करायला हवी. ईडीची पहिली नोटीस त्यांनाच पाठवायला हवी. सुधीर मुनगंटीवार याचं घर तब्बल ५०० कोटी रुपयांचं आहे. मी स्वतः त्यांचा तो बंगला पाहिला. या बंगल्याच्या ५व्या मजल्यावर पार्किंग आहे. रोपट्यांना एसी आहे. कलर कॉम्बिनेशनसाठी किचनचीही खास जोडणी केली आहे. ३३ कोटी वृक्ष लागवडीतील इतका पैसा भ्रष्टाचार आहे. याची पाळंमुळं खोदली पाहिजे.”

अमोल मिटकरी यांच्या या आरोपानंतर आता राष्ट्रावादी काँग्रेस आणि भारतीय जनता पक्षामध्ये चांगलीच जुंपली आहे. सुधीर मुनगंटीवार यांच्याकडून मागील काळात वारंवार महाविकासआघाडी सरकारवर जोरदार टीका झाली आहे. त्यामुळेच सत्ताधाऱ्यांकडूनही मुनगंटीवर यांना लक्ष्य केलं जात असल्याचं बोललं जात आहे.

Web Title:  Corruption allegations of NCP Leader Amol Mitkari on BJP Leader Sudhir Mungantiwar.