पवार आणि मुख्यमंत्र्यांमध्ये मातोश्रीवर महत्वाची बैठक; विरोधक-सत्ताधारी बैठका

मुंबई, २६ मे: एकीकडे राज्यावरील कोरोनाचे संकट अधिक गडद होत असताना दुसरीकडे लवकरच एक राजकीय भूकंप होणार अशा चर्चांना उधाण आले आहे. राष्ट्रवादी काँग्रेसचे अध्यक्ष शरद पवार, राज्याचे मुख्यमंत्री उद्धव ठाकरे आणि शिवसेना खासदार संजय राऊत यांच्यात झालेल्या गुप्त बैठकीनंतर अशा चर्चा सुरू झाल्या आहेत.

सोमवारी सकाळी राजभवनावर जाऊन राज्यपाल भगतसिंग कोश्यारी यांची भेट घेतल्यानंतर सायंकाळी शरद पवार मातोश्रीवर दाखल झाले. याठिकाणी पवार-ठाकरे-राऊत अशी गुप्त बैठक पार पडली. विशेष म्हणजे अगदी राज्यातल्या सत्तास्थापनेच्या महागोंधळात देखील ज्या शरद पवारांनी मातोश्रीची पायरी चढली नव्हती, ते शरद पवार काल मातोश्रीवर बैठकीसाठी हजर झाले. त्यामुळे राजकीय वर्तुळात पडद्यामागे नक्कीच काहीतरी शिजतंय ज्याची जनतेला खबर नाही, अशा चर्चा सुरू आहेत.

एकीकडे कोरोनाच्या रुग्णांची संख्या वाढत असताना, दुसरीकडे राज्य सरकार अपयशी ठरत असल्याचा शिक्का मारून राज्यात राष्ट्रपती राजवट लागू करण्याच्या हालचाली सुरू असल्याची भीती महाविकास आघाडी सरकारला वाटत आहे. त्यातून महाविकास आघाडीच्या नेत्यांच्या बैठका वाढल्या असल्याचं चित्र आहे. तर दुसरीकडे भाजपसह महाविकास आघाडीच्या नेत्यांच्या राजभवनवरील फेर्‍याही वाढल्या आहेत.

सोमवारी दुपारी शरद पवार राज्यपालांना भेटले, राज्यपालांनीच त्यांना भेटीसाठी बोलवलं होतं. तर त्यानंतर सायंकाळी भाजपचे खासदार नारायण राणे राज्यपालांना भेटले आणि त्यांनी थेट राज्यात राष्ट्रपती राजवट लागू करण्याची मागणी केली. त्यापूर्वी दोन दिवस आधी संजय राऊतही राज्यपालांना भेटून आले होते. त्याआधी भाजपने महाविकास आघाडी सरकारविरोधात केलेल्या आंदोलनातून महाविकास आघाडी सरकारच्या अपयशावर आरोप केले होते. तर भाजपचे नेते राजभवनवर जाऊन महाविकास आघाडी सरकारची तक्रारही करून आले होते.

News English Summary: On the one hand, the Corona crisis in the state is getting darker, on the other hand, there is talk of a political earthquake soon. Such discussions have started after a secret meeting between NCP president Sharad Pawar, state chief minister Uddhav Thackeray and Shiv Sena MP Sanjay Raut.

News English Title: Discussions have started after a secret meeting between NCP president Sharad Pawar state chief minister Uddhav Thackeray News Latest Updates.