CAA मुद्दा, मुख्यमंत्र्यांच्या 'दिल्ली वारी'नंतर वर्षा निवासवर महत्त्वपूर्ण बैठक पार पडली

मुंबई : मुख्यमंत्री उद्धव ठाकरे यांच्या वर्षा निवासस्थानी महत्त्वाची बैठक होत आहे. या बैठकीला स्वत: राष्ट्रवादीचे अध्यक्ष शरद पवार, उपमुख्यमंत्री अजित पवार, जलसंपदा मंत्री जयंत पाटील आणि शिवसेना खासदार संजय राऊतही उपस्थित आहेत. शरद पवार दुपारी चारच्या सुमारास वर्षा बंगल्यावर दाखल झाले. मुख्यमंत्री उद्धव ठाकरे यांनी काल दिल्लीत मॅरेथॉन बैठका घेतल्यानंतर, आज शरद पवारांसोबत बैठक होत आहे.

CAA ला मुख्यमंत्री उद्धव ठाकरे यांनी पाठिंबा दर्शवला आहे. त्यावर या बैठकीत चर्चा होते आहे अशी चर्चा आहे. तसंच अधिवेशनात काय काय करायचं याबाबतही चर्चा सुरु आहे असंही समजतं आहे. दिल्ली दौऱ्यात उद्धव ठाकरे यांनी पंतप्रधान नरेंद्र मोदींची भेट घेतली. त्यानंतर CAA हा नागरिकत्व देण्याचा कायदा आहे घेण्याचा नाही या कायद्याला घाबरण्याची गरज नाही असं मुख्यमंत्री उद्धव ठाकरे यांनी म्हटलं होतं. हा विषय या बैठकीत चर्चिला जाण्याची शक्यता आहे.

दरम्यान, पंतप्रधान नरेंद्र मोदी यांची भेट घेतल्यानंतर मुख्यमंत्री उद्धव ठाकरे यांनी CAA आणि NPR बद्दल गैरसमज पसरविला जात असल्याचे म्हटले आहे. यात घाबरण्यासारखे काहीही नाही असेही ते म्हणाले. आसामनंतर इतर कुठल्याही राज्यांमध्ये NRC राबवली जाणार नाही, असे पंतप्रधानांनी सांगितल्याची माहितीही त्यांनी दिली. उद्धव ठाकरेंच्या या पत्रकार परिषदेनंतर काँग्रेसच्या नेत्यांनी त्यांच्यावर निशाणा साधला. उद्धव ठाकरेंना हा विषय समजावून सांगावा लागेल. हे एवढे साधे सोपं नाही असेही ते म्हणाले. यावरुन काँग्रेस आणि शिवसेना आमने-सामने आली आहे.

Web Title: Story Meeting at Varsha Bungalow between Chief Minister Uddhav Thackeray Ajit Pawar and Sharad Pawar.