बलाढ्य अर्थशक्ती? भाजपकडून प्रचारासाठी सर्व खासगी चार्टर्ड प्लेन व हेलिकॉप्टर बुक?

नवी दिल्ली : लोकसभा निवडणुका जस जशा जवळ येऊ लागल्या आहेत तशी राजकीय पक्षांची सुद्धा धावपळ सुरु झाली आहे. त्यात सत्ताधारी भाजपकडून विरोधकांची वेगळ्याच प्रकारे कोंडी करण्याचे प्रयत्न सुरु असल्याचे वृत्त आहे. कारण, काँग्रेसचे प्रवक्ते आनंद शर्मा यांनी प्रसार माध्यमांना दिलेल्या माहितीनुसार सत्ताधारी भारतीय जनता पक्षाकडून आगामी लोकसभा निवडणुकीआधीच विरोधकांची राजकीय कोंडी करण्यासाठी अर्थकरणाच्या शक्तीवर देशातील जवळपास सर्वच खासगी चार्टर्ड प्लेन व हेलिकॉप्टर आधीच बुक केले आहेत.

तसेच त्यांनी हे सुद्धा पुढे स्पष्ट केलं की, ‘सत्ताधारी भाजप जरी अर्थकारणाच्या जीवावर राजकीय प्रचार सामुग्रीत आमच्या वरचढ असली, तरी आगामी लोकसभा निवडणूक आम्हीच जिंकणार’ असा विश्वास व्यक्त केला. त्यामुळे काँग्रेसच्या गोटातून आलेल्या या बातमीने भाजप किती झपाट्याने कामाला लागली आहे याचा प्रत्यय येतो.

आचारसंहिता लागण्याच्या आधी रोज नवनवीन घोषणा करणे सुरु आहे. तसेच विरोधकांची प्रचारादरम्यान राजकीय कोडी करण्यासाठी भाजप निरनिराळे हतखंडे वापरत असल्याचं समोर येते आहे. त्यातील एक भाग म्हणजे देशभरात आधीच निवडक खासगी चार्टर्ड प्लेन व हेलिकॉप्टर सेवा पुरविणारे असताना, ते सुद्धा आधीच बुक करून विरोधकांना कोंडीत पकडले आहे. तसेच यापुढे कदाचित भाजप देशभरातील प्रचार सभा आयोजित करण्यासाठी लागणारी भव्य पटांगण – मैदाने बुक करण्याची शक्यता वर्तविण्यात येते आहे.