बाजार थांबेना; गोव्यात महाराष्ट्रवादी गोमंतक पक्ष भाजपमध्ये विलीन

पणजी : गोव्यात महाराष्ट्रवादी गोमंतक पक्षाचे एकूण तीन आमदार आहेत त्यापैकी मनोहर आजगावकर आणि दीपक पावस्कर यांनी विधानसभेचे उपसभापती मायकल लोबो यांना पत्र लिहून पक्षच भाजपमध्ये विलीनीकरण करण्याचा निर्णय घेतल्याचे म्हटले आहे. त्यांनी रात्री पावणे दोनच्या सुमारास हे पत्र दिले आणि आम्ही दोन तृतीयांश सदस्य असल्याचे त्यांनी या पत्रात म्हटले आहे.

या २ आमदारांनी भाजपामध्ये प्रवेश घेतला आहे. या पत्रावर भारतीय जनता पक्षाच्या सरकारमध्ये उपमुख्यमंत्री असलेले पक्षाचे तिसरे आमदार सुदीन ढवळीकर यांची स्वाक्षरी नाही आहे. त्यामुळे त्यांची खुर्ची धोक्यात असल्याची चर्चा आता सर्वत्र सुरू आहे.

महाराष्ट्रवादी गोमंतक पक्षातील दोन आमदारांनी भाजपमध्ये प्रवेश केल्याने पक्षांतर बंदी कायद्यानुसार त्यांचे सदस्यत्व रद्द होत नाही. पण सरकारमध्ये उपमुख्यमंत्री असलेल्या ढवळीकरांची उचलबांगडी होण्याची शक्यता वर्तविली जात आहे.

Disclaimer: म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.