लोकसभा निवडणुकीच्या पार्श्वभूमीवर राष्ट्रवादीची मुंबईमध्ये महत्वाची बैठक

मुंबई : आगामी लोकसभा निवडणुकीच्या पार्श्वभूमीवर राष्ट्रवादी काँग्रेसने मुंबईमध्ये महत्वाची बैठक आयोजित केली आहे. स्वतः राष्ट्रवादीचे सर्वेसेवा शरद पवार या बैठकीला उपस्थित राहणार असल्याचे पक्षाकडून सांगण्यात आलं आहे. तसेच नालासोपाऱ्यात एटीएस’ने हस्तगत केलेल्या स्फोटकाप्रकरणी सुद्धा या बैठकीत चर्चा होणार असल्याचे समजते.

मुंबईमधील यशवंतराव चव्हाण सभागृहात उद्या सकाळी अकराच्या सुमारास ही महत्वाची बैठक बोलाविण्यात आली आहे. त्याला पक्षातील प्रफुल्ल पटेल, दिलीप वळसे-पाटील, छगन भुजबळ, जयंत पाटील, सुनील तटकरे, जितेंद्र आव्हाड, धनंजय मुंडे, गणेश नाईक तसेच जयदत्त क्षीरसागर आणि इतर सर्व महत्वाचे वरिष्ठ नेते उपस्थित राहणार आहेत.

आगामी लोकसभा निवडणुकीच्या अनुषंगाने तसेच सनातन संस्थेशी संबंधित व्यक्तींची अटकसत्र सुरु असून त्याचा सुद्धा आढावा घेऊन पक्ष त्यासंबंधित भूमिका स्पष्ट करू शकते असं सांगण्यात येत आहे.