सोशल मिडीयावर बदनामी, ‘हाताची घडी तोंडावर बोट’ पेजवर गुन्हा दाखल होणार?

पुणे : एनसीपीच्या वरिष्ठ नेत्यांची ‘हाताची घडी तोंडावर बोट’ या फेसबुक पेजवरून बदनामी केल्या प्रकरणी पुणे पोलीस आयुक्तांकडे तक्रार करण्यात आली आहे. या नेत्यांमध्ये खुद्द पक्षाध्यक्ष शरद पवार, माजी उपमुख्यमंत्री अजित पवार, खासदार सुप्रिया सुळे तसेच पक्षातील अनेक वरिष्ठ नेत्यांचा समावेश आहे.

फेसबुकवर ‘हाताची घडी, तोंडावर बोट’ या पेजच्या माध्यमातून एनसीपीच्या नेत्यांची खूप आक्षेपार्ह शब्दात बदनामी केली जात असल्याची लेखी तक्रार आणि आक्षेपार्ह फोटोसकट लेखी तक्रार करण्यात आली असून या तक्रारीत मजकुरात बदल करणे तसेच मूळ फोटोमध्ये मॉर्फिंग करण्याचे प्रकार सुरु आहेत असं तक्रारीत म्हटलं आहे. त्यामुळे या विषयाचे गांभीर्य लक्षात घेऊन हे पेज चालविणारे, त्यावर मजकूर टाकणारे आणि त्या पेजचे अॅडमिन यांच्यावर ‘माहिती तंत्रज्ञान कायद्या’नुसार गुन्हा दाखल करून कठोर कारवाई करावी, अशी लेखी तक्रारीत खासदार सुप्रिया सुळे यांनी मागणी केली आहे.

पुण्याचे पोलीस आयुक्त डॉ. के. व्यंकटेशम यांची भेट घेऊन ही लेखी तक्रार करण्यात आली आहे. राजकीय विरोधातून टीका करण्यास आमची काहीच हरकत नाही, परंतु वैयक्तिक पातळीवर जाऊन बदनामीकारक शब्द वापरले जात आहेत असं तक्रारीत सांगण्यात आलं आहे. विशेष म्हणजे आमच्या पक्षाच्या नेत्यांनी अथवा स्वतः मी कधीही कुठेही न केलेली विधाने तयार करून ती आमचीच आहेत, असे भासवत राज्यातील आणि देशभरातील लोकांमध्ये गैरसमज पसरविले जात आहेत असं तक्रारीत सांगण्यात आलं आहे.

Disclaimer: म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.