दाक्षिणात्य अभिनेते प्रकाश राज लोकसभेच्या रिंगणात

नवी दिल्ली : मोदी सरकारवर खुलेपणानं टीका करणारे आणि समाजातील प्रत्येक गंभीर प्रश्नावर बेधडकपणे भाष्य करणारे अभिनेते प्रकाश राज आता राजकारणाच्या आखाड्यात उतरणार आहेत. त्यांनी नववर्षाच्या सुरूवातीला आपण २०१९ ची लोकसभा निवडणुक लढवणार असल्याचं अधिकृत ट्विट केलं आहे. विशेष म्हणजे त्यासाठी त्यांनी कोणत्याही पक्षाची निवड केली नसून ते थेट अपक्ष उमेदवार म्हणून निवडणुकीच्या रिंगणात उतरणार आहेत.

मागील अनेक वर्षांपासून ते पंतप्रधान नरेंद्र मोदी आणि भारतीय जनता पक्षावर सडकून टीका करत आहेत. इतकंच नव्हे तर मी भाजपवर टीका करतो म्हणून मला कोणी चित्रपटात काम सुद्धा देत नाही, असा आरोप त्यांनी केला होता. कलाकारांची आणि विचारवंताची समाजात होणाऱ्या गळचेपीवरही आणि केंद्र सरकारच्या हुकूमशाहीवर त्यांनी कडाडून टिका केली होती.

‘ते म्हणतात की मी हिंदूच्या विरोधात आहे, पण मी हिंदूच्या विरोधात नसून मी पंतप्रधान नरेंद्र मोदी आणि भारतीय जनता पक्षाचे राष्ट्रीय अध्यक्ष अमित शाह यांच्या विरोधात आहे. एवढंच नाही तर माझ्यामते मोदी आणि अमित शाह हे स्वतः हिंदू नाहीत’ अशी बोचरी टीका त्यांनी जानेवारी २०१८ मध्ये ट्विटद्वारे केली होती. त्यांच्या या ट्विटमुळे अनेकांनी त्यांना सोशल मीडियावर लक्ष्य केलं. परंतु, आजही ते त्यांच्या भूमिकेवर ठाम आहेत.

HAPPY NEW YEAR TO EVERYONE..a new beginning .. more responsibility.. with UR support I will be contesting in the coming parliament elections as an INDEPENDENT CANDIDATE. Details of the constituency soon. Ab ki baar Janatha ki SARKAR #citizensvoice #justasking in parliament too..

— Prakash Raj (@prakashraaj) December 31, 2018