आयत्या बिळात चंदूबा..राष्ट्रवादीचा चंद्रकांत पाटलांवर हल्ला

पुणे: विधानसभा निवडणुकीचे मतदान जसजसे जवळ येऊ लागले आहे, तशी प्रचाराला धार चढली आहे. वर्तमानपत्रे, मोबाइल, टीव्ही वाहिन्यांसह सोशल मीडियातून एकमेकांवर आरोप-प्रत्यारोपांच्या फैरी झाडल्या जात आहेत. पुण्यातील कोथरूड विधानसभा मतदारसंघातून लढणारे भारतीय जनता पक्षाचे महाराष्ट्र प्रदेशाध्यक्ष चंद्रकांत पाटील सध्या विरोधकांच्या निशाण्यावर आहेत. राष्ट्रवादी काँग्रेसनं आज एका जुन्या मराठी म्हणीचं विडंबन करून पाटलांवर हल्ला चढवला आहे.

काही मराठी म्हणींचे नवे अर्थ…#NCP2019 #राष्ट्रवादीपुन्हा #MaharashtraAssemblyPolls #AssemblyElections #MaharashtraElections2019 pic.twitter.com/364mN4q9Fe

— NCP (@NCPspeaks) October 18, 2019

राष्ट्रवादीच्या अधिकृत ट्विटर अकाउंटवर आज एक पोस्ट टाकण्यात आली आहे. ‘आयत्या बिळात चंदूबा…’ असं त्यात नमूद करण्यात आलं आहे. ‘आयत्या बिळावर नागोबा’ या म्हणीत फेरफार करून ही म्हण बनवण्यात आली आहे. ‘कोथरूडमध्ये ‘चंपा’ जे करताहेत ते…’ असा या म्हणीचा अर्थही सोबत देण्यात आला आहे. ही पोस्ट प्रचंड व्हायरल होत आहे.

कोल्हापूरमधून पुण्यात निवडणूक लढविण्यासाठी आलेल्या चंद्रकांत पाटलांना विरोधकांनी लक्ष्य केलं आहे. ‘चंपा’ या नावाने चंद्रकांत पाटील यांना डिवचण्यात येत आहे. मात्र माझी आई लाडाने मला चंदा बोलते असं सांगत चंद्रकांत पाटलांनीही विरोधकांची फिरकी घेतली आहे. अशातच राष्ट्रवादीकडून काही मराठी म्हणींचे नवे अर्थ निघू लागलेत सांगत कोथरुडमध्ये बाहेरून आलेले चंद्रकांत पाटील म्हणजे आयत्या बिळात चंदूबा असं करुन चिमटा काढण्यात आला आहे.

कोथरुड मतदारसंघात मनसेने स्थानिक उमेदवार म्हणून किशोर शिंदे यांना उमेदवारी दिली आहे. या मतदारसंघात महाराष्ट्र नवनिर्माण सेनेची ताकद देखील आहे. किशोर शिंदे यांना मोदी लाटेतही या मतदारसंघातून २३ हजारांहून अधिक मते पडली होती. तर शिवसेनेचे उमेदवार चंद्रकांत मोकाटे हे २००९ मध्ये या भागाचे आमदार होते. त्यांना २०१४ मध्ये दुसऱ्या क्रमाकांची मते पडली होती. यंदा या मतदारसंघातून काँग्रेस-एनसीपीने उमेदवार न देता किशोर शिंदे यांना पाठिंबा दिला आहे. तर चंद्रकांत पाटील भारतीय जनता पक्षाकडून लढत आहे. त्यामुळे महाराष्ट्र नवनिर्माण सेना विरुद्ध भारतीय जनता पक्ष अशी थेट लढत या मतदारसंघात पाहायला मिळत आहे. त्यामुळे मतदारसंघात भारतीय जनता पक्ष आपला गड कायम राखणार की महाराष्ट्र नवनिर्माण सेनेचं इंजिन धावणार हे निकालानंतर स्पष्ट होईल.